چیف سلیکٹر کی دورہ انگلینڈ کی تیاری کیلئے سیمنگ وکٹیں بنانے کی ہدایت

ہفتہ 21 مئی 2016 13:37

اسلام آباد (اُردو پوائنٹ اخبارتازہ ترین - این این آئی۔21 مئی۔2016ء) پاکستان کرکٹ کے چیف سلیکٹر انضمام الحق نے دورہ انگلینڈ کی تیاریوں کیلئے مقامی کیوریٹرز سے سیمنگ وکٹیں بنانے کا مطالبہ کیا ہے۔ہوم کنڈیشنز میں انگلینڈ کے متاثر کن ریکارڈ کو دیکھتے ہوئے انضمام نے پی سی بی کے چیف کیوریٹر کو ہدایت کی کہ وہ 29 مئی سے لاہور میں شروع ہونے والے ٹریننگ کیمپ میں شرکت کرنے والے کھلاڑیوں کو اسی طرح کی سیمنگ وکٹیں فراہم کرنے کی کوشش کریں جن کا انہیں انگلینڈ میں سامنا کرنا پڑے گا۔

اس کے ساتھ انضمام نے پی سی بی کو ٹیم ہفتے قبل انگلینڈ بھیج کر ہیمپشائر کاوٴنٹی میں کیمپ لگانے کیلئے بھی راضی کر لیا ہے۔پی سی بی ذرائع نے بتایا کہ چیف سلیکٹر نے ہوم کنڈیشنز میں انگلش ٹیم کے ریکارڈ کا جائزہ لیا جس نے بہترین بیٹنگ کی حامل بھارتی ٹیم کو 2014 میں 3-1 سے شکست دی تھی ‘اس کے ساتھ ساتھ انہوں نے انگلینڈ کی حالیہ کارکردگی کا بھی جائزہ لیا جہاں انہوں نے رواں سال کے آغاز میں جنوبی افریقہ کو زیر کیا تھا۔

(جاری ہے)

چیف سلیکٹر کے مطابق امید ہے اسپاٹ فکسنگ میں سزا یافتہ محمد عامر کو دورہ انگلینڈ کیلئے ویزہ جاری کردیا جائے گا تاکہ پاکستانی باوٴلنگ حریف ٹیم کو بھی آزمائش میں ڈال سکے۔ذرائع نے بتایا کہ انضمام 2013 کے سیزن میں قومی ٹیم کے دورہ جنوبی افریقہ کے نتائج کو دیکھ کر پریشانی کا شکار ہیں جہاں گرین شرٹس کو 3-0 سے کلین سوئپ کا سامنا کرنا پڑا تھا ‘ ناقص کارکردگی کی اصل وجہ یہ تھی کہ پاکستانی کھلاڑی متحدہ عرب امارات کی بیٹنگ کیلئے سازگار وکٹوں پر کھیلنے کے عادی ہیں لہٰذا انگلش وکٹوں پر کھیلنے کیلئے انہیں وہاں کی کنڈیشنز کے مطابق خود کو ڈھالنا ہو گا۔

پاکستان دورہ انگلینڈ پر چار ٹیسٹ، پانچ ایک روزہ اور ایک ٹی ٹوئنٹی میچ کھیلے گا جہاں سیریز کا آغاز 14 جون سے لارڈز میں ہونے والے پہلے ٹیسٹ میچ سے ہو گا۔