عمرکورٹ میں بچی کو ذیادتی کا نشانہ بنا کر قتل کر دیا گیا‘لاش پانی سے بھرے کھڈے سے برآمد‘ خوف و ہراس پھیل گیا

بدھ 18 مئی 2016 12:18

عمرکورٹ(اُردو پوائنٹ اخبارتازہ ترین - آئی این پی۔18 مئی۔2016ء) عمر کورٹ کے علاقے چھاچھرو روڈ سے 8سالہ بچی کو اغواء کر کے ذیادتی کا نشانہ بنا کر قتل کر دیا گیا،بچی کی لاش پانی سے بھرے کھڈے سے برآمد ہوئی جس کے بعد علاقے میں خوف و ہراس پھیل گیا۔تفصیلات کے مطابق گذشتہ روز عمرکوٹ کے علاقے چھاچھرو روڈ پر وھرو بائی باس سے لا پتہ ہونے والی آٹھ سالہ بچی درخشاں کی لاش بدھ کو تین فٹ گہرے پانی کے کھڈے سے بر آمد لی۔

ورثاء کے مطابق بچی کو زیادتی کا نشانہ بنا کر قتل کیا گیا اور اس کے بعد لاش کو سنسان جگہ پر واقع پانی کے کھڈے میں پھینک دیا، بچی کے جسم پر تشدد کے نشانات بھی ہیں۔پولیس نے لاش کو تحویل میں لے کر پوسٹ مارٹم کے لیے سول ہسپتال منتقل کرکے مقتول بچی کے ورثاء کا بیان قلم بند کر لیا ہے، اورورثاء کے بیان کی روشنی میں تحقیقات شروع کر دی ہیں۔

(جاری ہے)

بچی سے ذیادتی ہونے کے حوالے سے پوچھے گئے سوال کے جواب میں پولیس کا کہنا تھا کہ پوسٹ مارٹم رپورٹ آنے کا انتظار ہے،اْس کے بعد ہی کوئی حتمی بات کہی جا سکے گی،تاہم اْنہوں نے تصدیق کی کہ بچی کے جسم پرتشدد کے نشانات موجود ہیں۔پاکستان میں بچوں کے ساتھ ذیادتی کے بعد قتل کر دینے کے واقعات تشویشناک حد تک بڑھتے جا رہے ہیں،اس سے قبل قصور ذیادتی کیس نے ہمارے معاشرے کی ذبوں حالی اور قانون کی بے حسی کی قلعی کھول دی تھی۔