پاکستان اورافغانستان کے مابین دو طرفہ تجارت بہت جلد 5ارب ڈالر سے تجاوز کرے گا

اسلام آباد ۔ 6 مئی (اُردو پوائنٹ اخبارتازہ ترین - اے پی پی۔06 مئی۔2016ء) افغانستان میں پاکستان کے سفیر سید ابرار حسین نے کہا ہے کہ پاکستان اورافغانستان کے مابین دو طرفہ تجارت بہت جلد 5ارب ڈالر سے تجاوز کرے گا، پاکستان افغانستان ٹرانزٹ ٹریڈ کو سہولت دینے کیلئے عزم ہیں، اس سے دو پڑوسی ملکوں کے درمیان دوطرفہ تجارت میں بھی اضافہ ہوگا۔ پاکستان اپنے پڑوسی ملک افغانستان کے ساتھ تعلقات کو انتہائی اہمیت دیتا ہے، پاکستان افغانستان کا سب سے بڑا اورا ہم تجارتی پارٹنر ہے۔

انہوں نے یہ بات کابل میں ”میڈ ان پاکستان ایگزیبیشن“ کے اختتامی سیشن سے خطاب کرتے ہوئے کہی۔ نمائش کا اہتمام راولپنڈی چیمبر آف کامرس نے پاکستانی سفارتخانے اور پاک افغان جوائنٹ چیمبر آف کامرس و صنعت کے اشتراک سے کیا ہے۔

(جاری ہے)

اس موقع پر خطاب کرتے ہوئے پاکستانی سفیر نے باہمی اعتماد کی بنیاد پر جامع پاک افغان پارٹنرشپ کو فروغ دینے کی ضرورت کو اجاگر کیا۔

انہوں نے کہا کہ پاکستان اپنے پڑوسی ملک افغانستان کے ساتھ تعلقات کو انتہائی اہمیت دیتا ہے کیونکہ دونوں ممالک ایک جیسے ثقافتی، تاریخی اور مذہبی رشتوں میں جڑے ہوئے ہیں۔ سید ابرار حسین نے کہا کہ دونوں ملکوں کے درمیان قریبی تجارتی تعلقات دونوں اطراف کے عوام کی خوشحالی کیلئے ضروری ہیں۔ انہوں نے حکومت پاکستان کی جانب سے افغانستان میں مختلف رابطوں کے منصوبوں پر کام جاری رکھنے کا عزم ظاہر کیا جو نہ صرف افغانستان بلکہ تمام خطے کیلئے فائدہ مند ثابت ہوں گے۔

انہوں نے افغانستان میں پاکستان کی جانب سے صحت، تعلیم اور انفراسٹرکچر سیکٹرز میں مختلف منصوبوں کو اجاگر کیا، خصوصاً طور خم۔جلال آباد ہائی وے جو تکمیل کے آخری مراحل میں ہے۔ ابرار حسین نے شرکاء کو بتایا کہ پاکستان اورا فغانستان پشاور اور جلال آباد اور چمن اور قندھار کے درمیان ریلوے لنکس پر بھی کام کر رہے ہیں۔ اس کے علاوہ پشاور-کابل موٹر وے بھی پروگرام میں شامل ہے۔ افغانستان کے نائب وزیر تجارت مزمل شنواری نے تقریب سے خطاب کرتے ہوئے دونوں ملکوں کے درمیان دوطرفہ تجارت میں اضافے کی ضرورت پر زور دیا۔