ایف سولہ کیلئے روکی گئی فنڈنگ کا کوئی حل نکال لیں گے ‘ سرتاج عزیز

اسلام آباد (اُردو پوائنٹ اخبارتازہ ترین - این این آئی۔03 مئی۔2016ء) وزیر اعظم کے مشیر سرتاج عزیزنے کہاہے کہ ایف سولہ کے لئے روکی گئی فنڈنگ کا کوئی حل نکال لیں گے ‘ شکیل آفریدی پر نہ پہلے دباوٴ قبول کیا نہ اب کریں گے ‘خطے میں اسلحے کی دوڑ نہیں چاہتے لیکن بھارت مجبور کر رہا ہے ‘پاکستان میں ایٹمی پروگرام کیلئے ایک موثر کمانڈ اینڈ کنٹرول نظام موجود ہے ‘ پاکستان اپنی ایٹمی صلاحیتوں اور عالمی ذمہ داریوں سے بخوبی واقف ہے پاکستان بھی بھارت کے جواب میں اپنی ایٹمی صلاحیت بڑھائے گا ‘بھارتی جاسوس کلبھوشن یادیو سے تحقیقات جاری ہیں۔

منگل کو ایٹمی عدم پھیلاوٴ کے حوالے سے منعقدہ سیمینارسے خطاب اور میڈیا سے گفتگو رہے تھے ۔ سرتاج عزیز نے کہا کہ افغانستان نے دھمکی نہیں دی تاہم مایوسی کا اظہارکیا ہے، افغانستان میں مفاہمت کے عمل کا حصہ ہیں ‘افغانستان میں امن کیلئے 2014سے طاقت کا استعمال جاری ہے تاہم یہ مسئلہ کا حل نہیں،افغان طالبان کے وفد نے حال ہی میں پاکستان کا دورہ کیا تھا، انہوں نے کہا کہ امریکہ نے پاکستان کو ایف سولہ بیچنے کی منظوری دے دی صرف فنانسنگ کا مسئلہ ہے۔

(جاری ہے)

امریکہ کو شکیل آفریدی پر تشویش ہے کیونکہ پاکستان نے شکیل آفریدی پر امریکی دباوٴ قبول نہیں کیا۔پاک بھارت مذاکرات کے حوالے سے مشیر خارجہ نے کہاکہ سیکرٹری خارجہ کے دورہ بھارت میں پاک بھارت جامع مزاکرات کی حتمی تاریخ طے نہیں ہوئی لیکن پاک بھارت مذاکرات ہوں گے ۔ سرتاج عزیر ے مزید کہا کہ بھارتی جاسوس کلبھوشن یادیو سے تحقیقات جاری ہیں، انہوں نے مزید کہا کہ پاکستان کا نیوکلیئر میزائل ٹیکنالوجی پروگرام عالمی معیارکیمطابق ہے۔

یہ نظام ہرقسم کے چیلنجز کاجواب دینے کی صلاحیت رکھتا ہے اور یہ نظام نیوکلیئرسپلائرزگروپ، میزائل ٹیکنالوجی پروگرام کے عالمی معیارکے مطابق ہے۔ ایک سوال کے جواب میں مشیر خارجہ سرتاج عزیز نے کہاکہ ایف 16 طیاروں کے دہشتگردوں کے ٹھکانوں پر استعمال سے کم سے نقصان ہوتا ہے امریکہ نے پاکستان کو ایف 16 طیاروں کی فروخت کی منظوری دے رکھی ہے اور اس کیلئے فنڈنگ ضائع نہیں ہوئی بلکہ رکی ہوئی ہے جس کی امریکی کانگریس سے منظوری ہونا باقی ہے اگر فنڈنگ کا انتظام ہوگیا تو ایف 16 طیارے مل جائیں گے اور اگر فنڈنگ کا انتظام نہیں ہوا تو پاکستان دیگر آپشنز پر غور کرے گا۔

انہوں نے کہا کہ ڈونلڈ ٹرمپ کے پاکستان مخالف بیانات ان کی انتخابی مہم کا حصہ ہیں ڈاکٹر شکیل آفریدی امریکہ کیلئے ہیرو اور پاکستان کا قومی مجرم ہے اور اس کا کیس اس وقت عدالت میں زیر سماعت ہے۔شکیل آفریدی کی امریکہ کو حوالگی سے متعلق دباو مسترد کردیا ہے۔