پاکستان میں امریکی ڈرون حملے بنیادی اقدار کی خلاف ورزی ہیں،چین

بیجنگ(اُردو پوائنٹ اخبارتازہ ترین - آئی این پی۔16 اپریل۔2016ء) چین نے پاکستان میں امریکی ڈرون حملوں کو بنیادی انسانی اقدار کی خلاف ورزی قراردیدیا،چین نے رواں ہفتے امریکہ کی جانب سے انسانی حقوق کی خلاف ورزیوں کی حوالے سے تفصیلی رپورٹ جاری کرتے ہوئے پاکستان میں ہونے والے امریکی ڈرون حملوں کو بھی تنقید کا نشانہ بنایا۔رپورٹ میں کہا گیا ہے کہ امریکہ نے دیگر ممالک میں شرمنا ک اورظالمانہ طریقے سے انسانی حقوق کی خلاف ورزیاں کیں اورشہریوں کے ساتھ کچرے کی طرح کا سلوک کیا،عراق اور شام میں امریکی فضائیہ کے حملوں میں ہزاروں عام شہری ہلاک ہوئے،اسی طرح امریکہ نے پاکستان اور یمن میں بغیر کسی توجہ کے بے رحمامانہ حملے کئے جن میں ہزاروں کی تعداد میں عام شہری ہلاک ہوئے۔

رپورٹ میں بتایا گیا ہے کہ امریکہ کے انسانی حقوق کے ریکارڈ میں کسی قسم کی بہتری دکھائی نہیں دے رہی،چینی اسٹیٹ کونسل انفارمیشن آفس کی جانب سے رپورٹ میں بتایا گیا ہے کہ گذشتہ سال امریکہ میں51ہزار675فائرنگ کے واقعات میں13ہزار136افراد ہلاک جبکہ26ہزار493افراد زخمی ہوئے۔

(جاری ہے)

امریکی پولیس نے گزشتہ سال965افراد کو ہلاک کیاجبکہ پولیس کی جانب سے طاقت کا بیہمانہ طریقے سے استعمال کیا گیا،امریکہ کے جیل خانہ جات کے نظام میں بدعنوانی کا دور دورہ ہے جہاں انسانی حقوق کی دھجیاں اڑائی جارہی ہیں،خواتین کے جیل خانہ جات میں قائم سب سے بڑے اصلاحاتی مرکز لوویل کورکشنل انسٹی ٹیوٹ میں خواتین اپنی بنیادی ضروریات پوری کرنے کے لئے جسم فروشی پر مجبور ہیں،مزید برآں گزشتہ دو دہائیوں میں امریکہ میں نسلی تعلقات بدترین سطح پر پہنچ چکے ہیں،جہاں61فیصد امریکی شہریوں نے نسلی تعلقات کو ملک کے لئے بدترین قراردیا ہے،امریکہ دوسرے ممالک میں بھی انسانی حقو ق کی شدید خلاف ورزیاں کررہاہے،امریکی فضائیہ نے عراق اورشام میں حملوں کے دوران ہزاروں عام شہریوں کو ہلاک کیا جبکہ پاکستان اور یمن میں بے رحمانہ طریقے سے کئے جانے والے ڈرون حملوں میں گزشتہ سال سینکڑوں شہری ہلاک ہوئے۔