اسلام آباد ٗ ضلعی انتظامیہ نے تحریک انصاف کی ایف نائن پارک میں جلسے کی درخواست مسترد کر دی

شہرمیں پہلے ہی دفعہ 144 نافذ ہے جس کے تحت جلسے، جلوس، اسلحہ کی نمائش اور لاؤڈ اسپیکر کے استعمال پر پابندی ہے ڈپٹی کمشنرکی جانب سے پی ٹی آئی کو اس حوالے سے تحریری طور پر آگاہ کردیا گیا 24 اپریل کو ایف نائن پارک میں ہی یوم تاسیس منائیں گے، ہمیں کسی سے اجازت لینے کی ضرورت نہیں ٗنعیم الحق

جمعہ 15 اپریل 2016 20:19

اسلام آباد(اُردو پوائنٹ اخبارتازہ ترین - این این آئی۔15 اپریل۔2016ء) ضلعی انتظامیہ نے پاکستان تحریک انصاف کی ایف نائن پارک میں جلسے کی درخواست مسترد کرتے ہوئے تحریری طورپرآگاہ کردیا۔ذرائع کے مطابق اسلام آباد میں ضلعی انتظامیہ نے پاکستان تحریک انصاف کی ایف نائن پارک میں جلسے کی درخواست مسترد کردی ٗ ڈپٹی کمشنرکی جانب سے پی ٹی آئی کو اس حوالے سے تحریری طور پر آگاہ کردیا گیا ہے۔

ڈپٹی کمشنرنے خط میں لکھا کہ شہرمیں پہلے ہی دفعہ 144 نافذ ہے جس کے تحت جلسے، جلوس، اسلحہ کی نمائش اور لاؤڈ اسپیکر کے استعمال پر پابندی ہے اور جلسے کی اجازت سے عوام کی جان و مال کی حفاظت اورآزادانہ نقل و حمل میں خلل پڑے گا۔دوسری جانب پاکستان تحریک انصاف کے ترجمان نعیم الحق کا کہنا ہے کہ 24 اپریل کو ایف نائن پارک میں ہی یوم تاسیس منائیں گے، ہمیں کسی سے اجازت لینے کی ضرورت نہیں، ڈسٹرکٹ مجسٹریٹ جلسے میں سکیورٹی دینے کا پابند ہے جب کہ پرامن سیاسی سرگرمیوں کے لیے ضلعی انتظامیہ کی اجازت کی ضرورت نہیں ہے۔

(جاری ہے)

ان کا کہنا تھا کہ تحریک انصاف کے یوم تاسیس کے جلسے میں رکاوٹیں ڈالی گئیں تو نتائج کی ذمہ دار انتظامیہ ہوگی، ہم نے یوم تاسیس کی جلسے کی اجازت مانگی ہی نہیں ہم نے تو انتظامیہ کو سیکیورٹی انتظامات کیلئے خط لکھا تھا۔