کراچی، (ن) لیگ والے کرپشن کے نانگا پربت ہیں،عمران خان کا سچ سامنے آگیا شریف برادران دولت کے انبار لگارہے ہیں،حلیم عادل شیخ

کراچی (اُردو پوائنٹ اخبارتازہ ترین - این این آئی۔04 اپریل۔2016ء) پاکستان تحریک انصاف کے رہنما حلیم عادل شیخ نے کہا ہے کہ ن لیگ والے کرپشن کے نانگا پربت ہیں،پانامہ لیکس نے شریفو ں کے معصوم چہرے بے نقاب کرنے کے ساتھ پارٹی کے چیئرمیں عمران خان کے سچ کو بھی ثابت کردیاہے۔ہم عمران کے مطالبے کی حمایت کرتے ہوئے وزیراعظم سے استعفیٰ مطالبہ کرتے ہیں ۔

پیپلزپارٹی کے سابق صدر کا پیسہ ملک میں واپس لانے کا دعویٰ کرنے والے بتائیں کہ وہ اپنا پیسہ کب ملک میں واپس لارہے ہیں۔اس بار حکومت کے درباری وزیر بھی شریف برادران کی صفائیاں پیش کرنے میں ناکام دکھائی دیتے ہیں،جن لوگوں نے سیاست میں رہ کر ناجائز دولت بنائی ان کا احتساب نہ کیا گیا تو تاریخ کبھی ہمیں معاف نہیں کریگی۔

(جاری ہے)

ملک میں ہر طرف بے انصافی اور زیادتیوں کا دور دورہ ہے ایسے میں شریف برادران دولت کے انبار لگانے میں مصروف ہیں۔

ان خیالات کا اظہار انہوں نے عادل ہاوس میں پارٹی کے کارکنوں سے ملاقات میں کیا۔حلیم عادل شیخ نے مزید کہا کہ ن لیگ کے اراکین اسمبلیوں کے بچے ملک سے باہرہیں جو خود یہاں اپنی کمائیاں کرنے میں مصروف ہیں۔ سب سے پہلے عمران خان نے آواز اٹھائی ورنہ پاکستان میں لوٹ مار کا بازار گرم کرنے والوں کو یہاں کوئی بھی پوچھنے والا نہیں تھا۔موجودہ حکومت نے ملکی خزانے کو جتنا نقصان پہنچایا اس کی نظیر پاکستان کی تاریخ میں کہیں نہیں ملتی، اب وقت آگیا ہے کہ قوم کو ان سے اپنا پیچھا چھڑانا ہوگا۔

عمران خان نے کئی سالوں سے عوام کو یہ بتانے کی کوشش کی ہے کہ موجود ہ حکمران عوام کی محنت کی کمائی کو ملک سے باہر بھجوارہے ہیں ۔انہوں نے مزید کہا کہ اب نیب کو اختیار ہے کہ وہ اس سارے معاملے کی انکوائری کرے کیونکہ اگر ایسا نہ ہوا تو لوگوں کا احتساب کے نام سے ایمان اٹھ جائے گا۔وزیراطلاعات کا شریف برادران کے معاملے میں جذباتی ہونا قدرتی عمل ہے کیونکہ ان پر ان کے اسقدر احسانات ہیں کہ جنھیں اتارنے کے لیے وہ دن رات عمران خان کی نقل وحرکت پر نظر رکھیں ہوئے ہیں۔