ورلڈ ٹی 20 پاکستانی کرکٹ شائقین کی 17ہزار ویزہ درخواستوں میں سے600پاکستانیوں کو ..
تازہ ترین : 1
ورلڈ ٹی 20 پاکستانی کرکٹ شائقین کی 17ہزار ویزہ درخواستوں میں سے600پاکستانیوں ..

ورلڈ ٹی 20 پاکستانی کرکٹ شائقین کی 17ہزار ویزہ درخواستوں میں سے600پاکستانیوں کو بھارتی ویزے جاری کرنے کی منظوری

دہلی(ا ردو پوائنٹ اخبارتازہ ترین-انٹرنیشنل پریس ایجنسی۔18مارچ۔2016ء)بھارت نے ورلڈٹی 20 میچزکے لئے پاکستانی کرکٹ شائقین کی طرف سے17ہزار ویزہ درخواستوں میں صرف600پاکستانیوں کو ویزے جاری کرنے کی منظور دی ہے۔بھارتی وزارت داخلہ کے مطابق میچز دیکھنے 17ہزار پاکستانی شائقین کی طرف سے درخواستیں موصول ہوئیں لیکن دونوں ممالک کے درمیان اس مسئلے پربڑھتی تلخی کے پیش نظر چھ سو پاکستانی شائقین کو ویزے جاری کرنے کی منظوری دی گئی۔

حکومت نے اس سلسلے میںسخت ہدایات جاری کرتے ہوئے کہا ہے کہ صرف انہی افراد کو ویزے جاری کیے جائیں گے جو مطلوبہ شرائط پر پورا اتریں گے۔بھارتی اخبار ’اکنامک ٹائمز‘ کے مطابق شناخت ظاہر نہ کرنے کی شرط پر حکام کے حوالے سے بتایا کہ بھارت ویزے جاری کرنے میں احتیاط سے کام لے رہا ہے کیونکہ 2008 کے ممبئی حملوں کی تحقیقات میں سامنے آیا تھا کہ دہشت گردوں نے میچز دیکھنے کے لئے ویزوںکا غلط استعمال کیا۔

اخبارلکھتا ہے کہ سید ذبیح الدین انصاری عرف ابو جندال کی تفتیش کے دوران انکشاف ہوا تھا کہ 2008 کے حملوں میں مطلوب ساجد میر اور میجر عبدالرحمان 2005 میں پاک بھارت کرکٹ سیریز دیکھنے کےلئے ویزے پر آئے اس کے بعد انہوں نے اسی ویزے پر بھارت کا دو بار دورہ کیا۔حکام کے مطابق بھارت کے ویزے کے لیے درخواست گزار کو اپنے میچ کا خریدا گیا ٹکٹ، ہوٹل بکنگ، رہائشی پتے کا ثبوت، پولیو ویکسی نیشن سرٹیفکیٹ جو ایک سال پرانا نہ ہو، پیش کرنا ہوں گے۔بھارت نے دہلی ، ممبئی، چنائی وغیرہ کے ساتھ کولکتہ کو بھی ’پورٹ آف اینٹری‘ قرار دیا ہے یعنی صرف انہی شہروں سے پاکستانیوں کی آمد اور روانگی ممکن ہوسکے گی۔

وقت اشاعت : 18/03/2016 - 13:04:33

متعلقہ عنوان :

اپنی رائے کا اظہار کریں