بھارت ‘ آر ایس ایس نے اپنی وردی میں تبدیلی کر دی
تازہ ترین : 1

بھارت ‘ آر ایس ایس نے اپنی وردی میں تبدیلی کر دی

نئی دہلی (اُردو پوائنٹ اخبارتازہ ترین۔14 مارچ۔2016ء)بھارت میں ہندو نظریاتی تنظیم آر ایس ایس نے اپنی وردی میں تبدیلی کرتے ہوئے خاکی رنگ کی نیکر کی جگہ بھورے رنگ کی پتلون کو وردی کا حصہ بنانے کا فیصلہ کیا ہے۔میڈیا رپورٹ کے مطابق اس بات کا اعلان راجستھان کے ناگور میں آر ایس ایس کی آل انڈیا یونین ایوان نمائندگان کے اجلاس کے بعد جنرل سیکریٹری بھیاجی جوشی نے پریس کانفرنس میں کیا۔

انھوں نے کہا کہ ہماری تنظیم وقت کے ساتھ تبدیل ہوتی ہے۔بھیاجی جوشی کے مطابق کوئی بھی تنظیم اتنی ترقی نہیں کر سکتی جتنی ہم نے کی ہے ‘ اس لیے ہم نے اس تبدیلی کا اعلان کیا ہے۔ انھوں نے کہا کہ گذشتہ تین سالوں میں تنظیم نے کافی ترقی کی ہے اور نوجوانوں کے درمیان اپنی جگہ بنائی ہے۔جے این یو میں مبینہ طور پر لگنے والے مبینہ ملک دشمن نعروں کے بارے میں انہوں نے کہاکہ ملک دشمن نعرے ملک کے کسی بھی حصے میں لگیں گے تو اس کے خلاف کارروائی تو کرنی پڑیگی۔

بھیاجی جوشی نے کہا کہ چاہے ملک کی کوئی بھی حکومت ہو اس طرح سے ملک کے ٹکڑے ٹکڑے کرنے والوں کو کوئی بھی برداشت نہیں کر سکتا۔انھوں نے سوال کیا کہ یہ ایک سنجیدہ موضوع ہے اور ایسی ذہنیت کو کیا سمجھا جائے۔کانگریسی رہنما غلام نبی آزاد کی آر ایس ایس کے مقابلے اسلامک سٹیٹ والے بیان پر بھی بھیاجی جوشی نے شدید تنقید کی۔انھوں نے کہا کہ غلام نبی آزاد نے ہمارے بارے میں جو بھی کہا اس سے ان کی جہالت جھلکتی ہے۔

وقت اشاعت : 14/03/2016 - 13:16:39

اپنی رائے کا اظہار کریں