کسی کو پاکستان کو لادین ریاست بنانے نہیں دیں گے ٗمولانا طاہر اشرفی

لادین تو دور کی بات کوئی پاکستان کے نام سے اسلامی بھی نہیں ہٹا سکتا ٗتقریب سے خطاب

بدھ 9 مارچ 2016 19:53

اسلام آباد(اُردو پوائنٹ اخبارتازہ ترین - این این آئی۔09 مارچ۔2016ء) پاکستان علماء کونسل کے چیئر مین مولانا طاہر اشرفی نے کہاہے کہ کسی کو پاکستان کو لادین ریاست بنانے نہیں دیں گے ٗلادین تو دور کی بات کوئی پاکستان کے نام سے اسلامی بھی نہیں ہٹا سکتا۔تقریب سے خطاب کرتے ہوئے مولانا طاہر اشرفی نے کہاکہ پنجاب میں منظور ہونے والے خواتین نسواں کی کچھ شقیں غیر اسلامی ہیں ٗبل کی منظوری سے پہلے علماء سے مشاورت کرنی چاہیے تھی ٗ خواتین کے حقوق پر قانونی بات کی جانی چاہیے۔

انہوں نے کہاکہ اسلام نے عورت کو جو حق دیا ہے وہ حق کوئی اور نہیں دے سکتا ٗعورتوں کے حقوق کا رونا رونے والے بتائیں کہ نے زیادتی کے کتنے مجرموں کو سزا دی گئی ٗ آپ یہ چاہتے ہیں عورت پر تشدد ختم ہو اور مردوں پر شروع ہو جائے تاہم ہم مردوں اور عورتوں پر تشدد کی شدید مذمت کرتے ہیں ٗجبرا اور زبردستی بل نافذ نہیں ہونے دینگے۔

(جاری ہے)

مولانا طاہر اشرفی نے کہا کہ پاکستان علماء کونسل امن و رواداری کی بات کرنے والی جماعت ہے ٗاگر ہم کنونشن سینٹر میں 5000 ہزار اکٹھے کر سکتے ہیں تو اس سے آگے دھرنے کیلئے بھی جاسکتے ہیں ٗپاکستان میں کل 8000 ہزار علماء شہید کئے گئے ٗاسلام آباد میں ڈیڑھ سال میں 36 علماء کی لاشیں اٹھائیں ٗان کے قاتل کیوں گرفتار نہ ہوئے۔

انھوں نے کہا کہ وزیر داخلہ چوہدری نثار علی خان اپنے خول سے باہر آئیں اور بتائیں کہ علماء پر کیوں حملے ہو رہے ہیں ٗاگر مولاناعبدالحمید صابری پر قاتلانہ حملہ کرنے والے مجرم کل تک گرفتار نہ ہوئے تو جمعہ کو یوم مذمت منایا جائے گا، علما کے قاتل نہ پکڑے گئے تو جمعہ کو اگلے لائحہ عمل کااعلان کریں گے۔چیئرمین پاکستان علما کونسل کے مطابق کسی کو بھی پاکستان کو لادین ریاست بنانے کی ہرگز اجازت نہیں دیں گے ٗلادین تو دور کی بات ہے کوئی ماں کا لال پاکستان کے نام سے اسلامی بھی نہیں ہٹا سکتا۔ انہوں نے کہاکہ قومی ایکشن پلان کو صرف مسجد ومحراب تک محدود نہ رکھا جائے ٗچاہتے ہیں کہ مسلم امہ مضبوط ہو اور نیٹو و امریکا سے مسلم ممالک کی جان چھوٹ جائے۔