کچھ ملٹی نیشنل ادویات ساز کمپنیوں نے دوسری بار عدالت عالیہ سے غلط بیانی کی بنیاد پر سٹے لے کر قیمتوں میں بلا جواز اضافہ کر دیا ،سائرہ افضل تارڑ

اسلام آباد(اُردو پوائنٹ اخبارتازہ ترین - این این آئی۔19 فروری۔2016ء)وزیر مملکت سائرہ افضل تارڑ نے کہا ہے کہ ادویا ت کی قیمتوں میں اضافہ ڈرگ ریگولیٹری اتھارٹی یا حکومت نے نہیں کیا ہے۔بلکہ کچھ ملٹی نیشنل ادویات ساز کمپنیوں نے دوسری بار عدالت عالیہ سے غلط بیانی کی بنیاد پر stay لے کر ادویات کی قیمتوں میں بلا جواز اضافہ کر دیا ہے۔ حکومت عوام کے ساتھ اس طرح کی زیادتی برداشت نہیں کرے گی ۔

قانون شکنی کی اجازت نہیں دی جا سکتی ۔ ادویات کی قیمتوں کو طے کرنے کا ایک قانونی طریقہ ہے ۔ پرائسنگ پالیسی کے مطابق ڈرگ پرائسنگ کمیٹی قیمتوں کا تعین ایک فارمولے کے تحت کرتی ہے ۔ انہوں نے کہا کہ ہم عدالتوں کا احترام کرتے ہیں لیکن اس معاملے پر حکومت عدالت عظمیٰ میں ضرور جائے گی اور قیمتوں میں اس بلا اجازت اضافے کو چیلنج کرے گی ۔

(جاری ہے)

اس مسئلے پر مزید بات چیت کے لیے Pharma Bureu اور PPMA کو بلایا گیا تھا جس میں PPMA نے اجلاس میں شرکت کی اور کہا کہ اس طرح کے مسائل افہام تفہیم سے حل ہونے چاہیے نہ یک طرف فیصلہ ہونا چاہیے۔

آج کی میٹنگ میں Pharma Bureu نے شرکت نہ کر کے یہ بات ثابت کر دی ہے کہ انہوں نے ادویات کی قیمتوں میں یکطرفہ ، بلا اجازت اور بلا جواز اضافہ کر کے عوام کے ساتھ سخت زیادتی کی ہے ۔وزیر صحت نے کہا ہے کہ اپوزیشن پوائنٹ سکورنگ نہ کرے ۔ بلکہ وہ اس طرح کی تنقید کر کے ان کمپنیوں کی حمایت کر رہی ہے جنہوں نے بغیر کسی اجازت کے یکطرفہ اضافہ کیا ہے ۔ اس طرح حکومتی موقف کو جان بوجھ کر نقصان پہنچایاجا رہا ہے۔

انہوں نے کہا کہ بار بار تقریر کرنے سے آپ عوام کاساتھ نہیں دے رہے ہوتے بلکہ الٹا حکومت کو دباؤ ڈالا جا رہا ہے ۔ اگر آپ عوام کی بھلائی چاہتے ہیں تو ہمارے ساتھ مل کر ان مافیاز کے خلاف کھڑے ہوں جو سٹے کی آڑ میں عوام سے کروڑوں روپے ہتھیا رہے ہیں۔ سائرہ افض تارڑ نے کہا کہ موجودہ حکومت عملی کام پر یقین رکھتی ہیں نہ کہ کھوکھلے نعرورں پر ۔ تنقید کرنے والے بھول گئے ہیں کہ وزارت صحت نے ’’ہیپاٹائٹس سی‘‘ کی دوا جو عام آدمی کی پہنچ سے باہر تھی ۔ دنیا میں سب سے کم قیمت پرپاکستان میں اس کی فراہمی کو یقینی بنایا ہے۔