پی آئی اے کے بے گناہ ملازمین کی پولیس کے ہاتھوں مبینہ ہلاکت پر متعلقہ حکام کے خلاف عدالتی تحقیقاتی کمیشن تشکیل دیا جائے‘راجہ ناصر عباس

قومی ادارے ملک و قوم کا اثاثہ ہیں ،یہ کسی کی ذاتی جاگیر نہیں کہ ان کی بندر بانٹ کی جائے ‘مرکزی سیکرٹری جنرل مجلس وحدت مسلمین

منگل 2 فروری 2016 22:06

لاہور(اُردو پوائنٹ اخبارتازہ ترین - این این آئی۔02 فروری۔2016ء ) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے پی آئی اے کی مجوزہ نجکاری کے خلاف احتجاج کرنے والے ملازمین پرفائرنگ اور وحشیانہ لاٹھی چارج کی شدید مذمت کرتے ہوئے ہوئے کہاکہ حکومت عوام سے احتجاج کا بنیادی حق بھی چھیننا چاہتی ہے،بے گناہ ملازمین کی پولیس کے ہاتھوں مبینہ ہلاکت پر متعلقہ حکام کے خلاف عدالتی تحقیقاتی کمیشن تشکیل دیا جائے اور ذمہ داران کو انصاف کے کٹہرے میں لایا جائے۔

ا نہوں نے کہاکہ قومی اداروں میں مسلسل خسارہ حکومت کی ناکامی اور نا اہلی ہے۔وطن عزیز کو معاشی طور پر مستحکم کرنے میں حکومت مکمل طور پر ناکام ہو چکی ہے جس کی بنیادی وجہ بڑے بڑے قومی اداروں کے کلیدی عہدوں پر نا اہل افراد کی تعیناتی ہے۔

(جاری ہے)

ایک طرف قومی ایئر لائن میں خسارے کا رونا رویا جا رہا ہے اور دوسری طرف حکومت نے ایک غیر ملکی کو پچاس لاکھ روپے ماہانہ پر ملازمت دے رکھی ہے ۔

قومی وسائل کو مال غنیمت کی طرح لوٹنے کا یہ باب اب بند ہو چاہیے۔قومی ادارے ملک و قوم کا اثاثہ ہیں ۔یہ کسی کی ذاتی جاگیر نہیں کہ ان کی بندر بانٹ کی جائے ۔قومی اداروں کی حفاظت اور ان کی اعلی انتظامی پوسٹون پر باصلاحیت لوگوں کی تعیناتی حکومت کی ذمہ داری ہے تاکہ اداروں کو نفع بخش بنایا جا سکے۔پی آئی اے سمیت تمام قومی اداروں ہماری طرف سے ہر اس فیصلے کی سخت مخالفت کی جائے گی جس میں ادارے کے ملازمین کی مرضی شامل نہ ہو۔