فیصل آباد میں مبینہ پولیس مقابلے کے دوران2 نوجوانوں کی ہلاکت کے خلاف ورثا ء کا احتجاج

مظاہرین ضلع کونسل میں ایک راہگیر پر تشدد کے بعد سی پی او دفتر پر دھاوا بول دیا ٗ گیٹ پر اینٹیں اور ڈنڈے برسائے

منگل 2 فروری 2016 21:59

فیصل آباد(اُردو پوائنٹ اخبارتازہ ترین - این این آئی۔02 فروری۔2016ء) فیصل آباد میں مبینہ پولیس مقابلے کے دوران2 نوجوانوں کی ہلاکت کے خلاف ورثا اور اہل علاقہ نے شدید احتجاج کیا ٗ مشتعل مظاہرین ضلع کونسل میں ایک راہگیر پر تشدد کے بعد سی پی او دفتر پر دھاوا بول دیا اور گیٹ پر اینٹیں اور ڈنڈے برسائے۔فیصل آباد میں گزشتہ روز ملت ٹاون کے علاقے میں ایک مبینہ پولیس مقابلے میں 2 نوجوانوں کی ہلاکت کے خلاف ورثا اور اہل علاقہ احتجاج کرتے ہوئے ضلع کونسل پہنچ گئے جہاں خواتین نے سڑک پر لیٹ کر ٹریفک بلاک کردیا۔

(جاری ہے)

اس دوران ایک راہگیر نے وہاں سے گزرنے کی کوشش کی تو مشتعل مظاہرین نے اسے مارنا شروع کردیا،بعد میں مشتعل مظاہرین نے سی پی او کے دفتر کے مرکزی گیٹ پر دھاوا بول دیا ۔ورثا کا الزام تھا کہ آصف اور وسیم کو ناکے پر نہ رکنے پر پولیس اہلکاروں نے فائرنگ کر دی اور اسے پولیس مقابلے کا رنگ دے دیا ۔والدہ کے مطابق یہ موٹر سائیکل پر جا رہے تھے کہ پویس نے ناکے پر ان کو گولیاں ماریں ہیں اور مار دیا ہے ۔ پولیس کے مطابق ہلاک ہونے والے آصف کے خلاف 11 مقدمات کا ریکارڈ مل گیا ہے جبکہ وسیم کے بارے میں بھی چھان بین کی جا رہی ہے، بعد میں اعلیٰ حکام کی جانب سے تحقیقات کی یقین دہانی پر مظاہرین منتشر ہوگئے۔

متعلقہ عنوان :