چین کا افغان عمل کیلئے بھارت ،ایران اور روس سے رابطے بڑھانے کا اعلان

بدھ 27 جنوری 2016 13:16

بیجنگ (اُردو پوائنٹ اخبارتازہ ترین - این این آئی۔27 جنوری۔2016ء) چین نے افغان عمل کیلئے بھارت ،ایران اور روس سے رابطے بڑھانے کا اعلان کرتے ہوئے کہا ہے کہ امید ہے پاکستان بھی افغان عمل میں اپنا منفرد کردار جاری رکھے گا۔بیجنگ میں چین کے وزیرخارجہ وانگ یی نے افغان ہم منصب صلاح الدین کے ساتھ پریس کانفرنس میں کہا کہ چین نے افغان امن عمل میں مصالحت اور سہولت کار کا کردار ادا کرتے رہنے کا عزم ظاہر کیا ہے ۔

(جاری ہے)

انہوں نے کہاکہ امن عمل کی کامیابی کیلئے بھارت ایران اور روس سے بھی رابطے بڑھائے جائیں گے،بات چیت سے ہی افغانستان میں پائیدار امن اور استحکام ممکن ہے ، چین امن عمل کی کامیابی کے لیے اپنا کردار ادا کرتا رہے گا، دیگر فریقین بھی اس سلسلے میں اپنا کردار ادا کریں ۔چینی وزیرخارجہ نے کہا کہ افغان حکومت اور دیگر گروہ اتفاق رائے سے ایسا لائحہ عمل تشکیل دیں جو سب کے لیے قابل قبول ہو، امید ہے اس سلسلے میں افغان طالبان بھی مثبت کردار ادا کریں گے۔