موجودہ نظام نہ بدلا گیا تو نوجوان اعلیٰ تعلیم و باعزت روزگار سے محروم رہیں گے،مظہر علوی

ہفتہ 9 جنوری 2016 22:08

اسلام آباد(اُردو پوائنٹ اخبارتازہ ترین - آئی این پی۔09 جنوری۔2016ء) پاکستان عوامی تحریک یوتھ ونگ کے مرکزی صدر مظہر علوی نے کہا ہے کہ پاکستانی نوجوانوں نے تبدیلی کیلئے جس جدوجہد کا آغاز کیا ہے اس کی بنیاد قائد عوامی تحریک ڈاکٹر طاہر القادری نے رکھی،جلد نااہل حکمرانوں اور کرپٹ نظام انتخاب کا سورج ڈوب جائے گااور غریب عوام اور نوجوانوں کیلئے استحکام پاکستان و عوامی خوشحالی کا سورج طلوع ہو گا۔

غریب عوام اور نوجوانوں کیلئے استحکام پاکستان اور عوامی خوشحالی کی نئی صبح کا آغاز ہونے والا ہے، نوجوان تحریک پاکستان کے جذبے کے ساتھ ظلم اور استحصالی نظام کے خلاف پرامن جمہوری جدوجہد کے تسلسل کو جاری رکھیں، آج کا نوجوان خوش نصیب ہے کہ اسے ڈاکٹر طاہر القادری جیسی قیادت میسر ہے، وہ مرکزی سیکرٹریٹ میں اسلام آباد سے آئے ہوئے مرکزی کوآرڈینیٹر برائے یوتھ ونگ حمزہ بٹ کی قیادت میں وفد سے ملاقات میں گفتگو کررہے تھے، اس موقع پر عوامی تحریک یوتھ ونگ اسلام آباد کے نوجوان بھی موجود تھے۔

(جاری ہے)

مظہرعلوی نے کہا کہ موجودہ حکمرانوں اور انتخابی نظام کو نہ بدلا گیا تو نوجوان اعلیٰ تعلیم و باعزت روزگار سے محروم رہیں گے اور برین ڈرین کا المیہ اس ملک کا مقدر بنارہے گا، طلبہ اور نوجوان اگر روشن مستقبل چاہتے ہیں تو انہیں انتخابی نظام کے خلاف موثر جدوجہد کو جاری رکھنا ہو گا۔ انہوں نے کہا کہ تبدیلی کا وقت آج ہے اور اس کیلئے نوجوان عوامی تحریک یوتھ ونگ کا ساتھ دے کر دنیا کو تبدیلی کا پیغام دیں۔ ڈاکٹر طاہر القادری کا ویژن پاکستان کو روشن مستقبل دینا ہے،ضرورت اس امر کی ہے کہ تبدیلی کیلئے ان کا دست و بازو بنا جائے۔

Facebook Twitter Google + Share on Whatsapp

موجودہ نظام نہ بدلا گیا تو نوجوان اعلیٰ تعلیم و باعزت روزگار سے محروم رہیں گے،مظہر علوی

متعلقہ عنوان :

مزید اہم خبریں