پٹھانکوٹ ائیربیس پر حملے کے بعد بھارتی میڈیا کی پاکستان کے خلاف زہرفشانی اورالزام تراشیوں کاسلسلہ جاری

پٹھانکوٹ حملے میں پاکستانی خفیہ ایجنسی ملوث ہے،بھارتی میڈیا کا الزام بھارتی اخبار ’’انڈیا ٹوڈے‘‘ کی رپورٹ میں دعویٰ

ہفتہ 2 جنوری 2016 19:27

پٹھانکوٹ ائیربیس پر حملے کے بعد بھارتی میڈیا کی پاکستان کے خلاف زہرفشانی ..

نئی دہلی (اُردو پوائنٹ اخبارتازہ ترین - آئی این پی۔02 جنوری۔2016ء) بھارتی میڈیا نے الزام عائد کیا ہے کہ پٹھانکوٹ ائربیس پر حملے میں پاکستانی خفیہ ایجنسی ملوث ہے،30دسمبر کو6 دہشتگردوں کو حملے کیلئے گرداسپور بارڈر کے ذریعے بھارت میں داخل کیا گیا ،عسکریت پسندوں کو بہاولپور میں تربیت فراہم کی گئی اور انھیں ائیربیس میں لڑاکا طیاروں کو تباہ کرنے کا ٹاسک سونپا گیا،یکم جنوری کو قومی سلامتی کے مشیر اجیت دوول نے انڈین ائیرفورس،این ایس جی اور پنجاب پولیس کو ممکنہ حملے کے بارے میں آگاہ کیا تھا ۔

ہفتہ کو بھارتی اخبار ’’انڈیا ٹوڈے‘‘ کی رپورٹ کے مطابق پٹھانکوٹ ائربیس پر حملے کے پیچھے پاکستانی خفیہ ایجنسی کا ہاتھ ہے۔ پاکستانی خفیہ ایجنسی کے اہلکاروں نے دسمبر میں کالعدم لشکر طیبہ،جیش محمد اور حزب المجاہدین کے رہنما وں سے آزاد کشمیر میں ملاقات کرکے حملے کی منصوبہ بندی کی تھی۔

(جاری ہے)

حملے کیلئے چھ دہشتگردوں کو 30 دسمبر 2015 کو گرداسپور بارڈر کے ذریعے بھارت میں داخل کیا گیا ۔

رپورٹ میں الزام عائد کیا گیا ہے کہ عسکریت پسندوں کو بہاولپور میں تربیت فراہم کی گئی اور انھیں پٹھانکوٹ ائیربیس میں لڑاکا طیاروں کو تباہ کرنے کا ٹاسک سونپا گیا۔سیکورٹی فورسز نے مارے گئے دہشتگردوں کے قبضے سے اے کے 47رائفلرز،ہینڈ گرینیڈ اور جی پی ایس ٹریکر قبضے میں لیے ہیں۔بھارتی اخبار کے مطابق یکم جنوری کو قومی سلامتی کے مشیر اجیت دوول نے انڈین ائیرفورس،این ایس جی اور پنجاب پولیس کو ممکنہ حملے کے بارے میں آگاہ کیا تھا۔دوسری جانب بھارتی سیکورٹی حکام نے دعویٰ کیا ہے کہ پٹھانکوٹ ائیربیس پر حملہ کرنے والے دہشتگرد سرحد پار اپنے معاونین سے مسلسل رابطے میں رہے اور حملے کیلئے استعمال کی گئی کار منگوانے کیلئے پاکستان کے موبائل نمبر پر کال کی گئی ۔