کرکٹ کھیلنے کا شوق زمان پارک سے پیدا ہوا،فاسٹ باولر بننے کیلئے اپنا باولنگ ایکشن مکمل طور پر تبدیل کرنا پڑا،عمران خان

لاہور (اُردو پوائنٹ اخبارتازہ ترین - آئی این پی۔14نومبر۔2015ء) پاکستان تحر یک انصاف کے چیئرمین اور قومی کرکٹ ٹیم کے سابق کپتان عمران خان نے کہاہے کہ انہیں کرکٹ کھیلنے کا شوق زمان پارک سے پیدا ہوا اور فاسٹ باولنگ کرنے کا شو ق فاسٹ باولر ڈینس للی کو دیکھ کر پیدا ہو ا،فاسٹ باولر بننے کیلئے اپنا باولنگ ایکشن مکمل طور پر تبدیل کرنا پڑا۔وہ ہفتہ کو نجی ٹی وی کے ساتھ گفتگو کررہے تھے۔

انہوں نے کہا کہ ان کے نانا گورنمنٹ کالج کی کرکٹ ٹیم کے کپتان تھے اور ان کے ماموں نے بھی فرسٹ کلاس کرکٹ کھیلی ،زمان پارک میں ساری فیملی رہتی تھی اور وہیں پارک میں ہم سب مل کرکرکٹ کھیلا کرتے تھے جہاں سے کرکٹ کھیلنے کا شوق پیدا ہوا۔عمران خان نے کہا کہ وہ ایک میڈیم پیسر باولر تھے لیکن ڈینس للی کو باولنگ کرتے ہوئے دیکھ کر انہیں فاسٹ باولر بننے کا شوق ہوا جبکہ وہ ایک میڈیم پیسر تھے ان کیلئے فاسٹ باولر بننا انتہائی مشکل کام تھا لیکن انہوں نے ہمت نہیں ہاری اور اپنی کوشش جاری رکھی۔

(جاری ہے)

انہوں نے کہا کہ انہیں فاسٹ باولر بننے کیلئے اپنا باولنگ ایکشن مکمل طور پر تبدیل کرنا پڑا،میڈیم گیند کروانے میں ایکشن اور تھا اور فاسٹ باولر بننے کیلئے ایکشن تبدیل کیا اور وہ وقت انتہائی مشکل تھا کیونکہ کبھی کبھی پرفارمنس اچھی نہیں ہوتی تھی جس کے باعث دیگر دوست کھلاڑی اکیڈمی میں ان کا مذاق بھی اڑاتے تھے لیکن انہوں نے اپنی جدو جہد جاری رکھی اور فاسٹ باولر بننے میں کامیا ب ہوئے، عمران خان نے کہا کہ خوابوں کو پورا کرنے کیلئے ارادے مضبوط ہونے چاہیے ،میں رات کو سونے سے پہلے سوچتا تھا کہ آج مجھ سے کھیل کے دوران کیا غلطیاں ہوئیں اور الگے دن ان پر قابو پانے اور انہیں ٹھیک کرنے کی کوشش کرتا تھا۔

انہوں نے کہا کہ جس دن پرفارمنس اچھی نہیں ہوتی تھی میں اس دن کا اخبار نہیں پڑھتا تھا کیوں کہ میں ایک کھلاڑی ہوں اور مجھے اپنی غلطیوں کا زیادہ اچھے طریقے سے پتہ ہے اس لیے جو ملاحظہ اپنا میں خود کرسکتاہوں وہ کوئی دوسرا نہیں کرسکتا۔