اب خون پانی کی طرح بہے گا ٗ شام اور عراق میں داعش کی دھمکی
تازہ ترین : 1

اب خون پانی کی طرح بہے گا ٗ شام اور عراق میں داعش کی دھمکی

شام کے علاقے رقا میں داعش کے برطانوی نژاد دہشت گرد محمد ایموازی عرف ’جہادی جان‘ کو نشانہ بنایا گیا ٗامریکی حکام

لندن (اُردو پوائنٹ اخبارتازہ ترین۔13 نومبر۔2015ء)شام اور عراق میں موجود دہشت گرد تنظیم داعش نے روس کو حملے کی دھمکی دیتے ہوئے کہا ہے کہ اب خون پانی کی طرح بہے گا۔برطانوی اخبار دی انڈیپنٹنٹ کے مطابق داعش کے غیر ملکی لینگویج پروپیگنڈا گروپ الحریت میڈیا سینٹر کی جانب سے جاری ویڈیو میں روس کو دھمکی دی گئی ہے کہ ’’جلد بہت جلد خون پانی کی طرح بہے گا۔

ویڈیو میں کہا گیا کہ کافر کا گلہ چاقو کی مدد سے کاٹ دیا جائے گا اور بہت جلد کرملین (روس کا ایوان صدر) ہمارا ہوگا۔دوسری جانب امریکی محکمہ دفاع پینٹاگون کے پریس سیکرٹری پیٹر کک کی جانب سے جاری بیان میں کہا گیا ہے کہ شام کے علاقے رقا میں داعش کے برطانوی نژاد دہشت گرد محمد ایموازی عرف ’جہادی جان‘ کو نشانہ بنایا گیا ان حملے میں ان کے زخمی یا ہلاک ہونے کے حوالے سے کوئی معلومات فراہم نہیں کی گئیں۔

پینٹاگون کی جانب سے جاری بیان میں کہا گیا کہ جہادی جان ان ویڈیوز میں موجود تھے جن میں امریکی صحافی سٹیون سوتلوف اورجیمز فولی، برطانیہ امدادی کارکن ڈیوڈ ہینز اور ایلن ہیننگ، امریکی امدادی کارکن عبدالرحمن کیسگ اور بہت سے دیگر مغویوں کو ہلاک کیا گیا۔واضح رہے کہ رواں برس اکتوبر میں مصر کے شہر شرم الشیخ کے صحرائے سینا میں تباہ ہونے والے روسی مسافر طیارے کی ذمہ داری بھی داعش نے ہی قبول کی تھی۔

طیارے میں عملے کے افراد سمیت 224 مسافر ہلاک ہو گئے تھے جن میں زیادہ تعداد روسی شہریوں کی ہی تھی۔ چند روز قبل روسی حکام نے ایک بیان میں کہا تھا کہ داعش نے روس کے جنوب مشرقی گاؤں کینتیشیوو کو بموں کے ذریعے تباہ کرنے کا منصوبہ بنایا تھا جسے اسپیشل فورسز نے گزشتہ ہفتے ناکام بنایا۔

مزید متعلقہ خبریں پڑھئیے‎ :

وقت اشاعت : 13/11/2015 - 18:02:58

متعلقہ عنوان :

اپنی رائے کا اظہار کریں