یاسر شاہ ون ڈے سیریز میں بھی انگلینڈ کو تگنی کا ناچ نچانے کیلیے پْراعتماد

اتوار 8 نومبر 2015 14:49

یاسر شاہ ون ڈے سیریز میں بھی انگلینڈ کو تگنی کا ناچ نچانے کیلیے پْراعتماد

ابو ظبی(اُردو پوائنٹ اخبارتازہ ترین - آن لائن۔8 نومبر۔2015ء) یاسر شاہ ون ڈے سیریز میں بھی انگلینڈ کو تگنی کا ناچ نچانے کیلیے پْراعتماد ہیں،ان کا کہنا ہے کہ حریف سائیڈ کی وکٹیں اڑانے کا سلسلہ جاری رکھوں گا، جارحانہ انداز میری طاقت اور اس پر کوئی سمجھوتہ نہیں کرسکتا، جب سست پڑوں توکنٹرول کھو بیٹھتا ہوں، شین وارن کے مشوروں کے باوجود اپنا فطری انداز تبدیل نہیں کروں گا۔

انگلینڈ کے خلاف دو ٹیسٹ میں 15 وکٹیں لے کر نہ صرف اپنی ٹیم کی 2-0 سے کامیابی میں اہم کردار نبھایا بلکہ مین آف دی سیریز کا ایوارڈ بھی حاصل کیا، وہ کمر میں تکلیف کے باعث ابوظبی میں پہلا ٹیسٹ نہیں کھیل پائے جو ڈرا ہوگیا تھا۔انھیں اس میچ کا حصہ نہ ہونے پر بھی کافی مایوسی ہے میڈیا سے بات کرتے ہوئے مایہ ناز اسپنر یاسر شاہ نے کہاکہ اب اپنی پوری توجہ 11 نومبر سے انگلش ٹیم کے خلاف شروع ہونے والی چار ون ڈے میچز کی سیریز پر مرکوز کرچکا ہوں، اور حریف سائیڈ کی وکٹیں گرانے کا سلسلہ برقرار رکھنا چاہتاہوں۔

(جاری ہے)

ان کاکہنا تھاکہ سری لنکا کی وکٹوں میں کافی باوٴنس تھا مگر یو اے ای میں پچز سلوہے اور مجھے ان پر کافی محنت کرنا پڑتی ہے۔اس کے باوجود توقعات پر پورا اترنے کی پوری کوشش کروں گا۔یاسر شاہ نے کہاکہ فطری طورپر میری بولنگ میں جارحانہ پن موجود ہے، اسی کی وجہ سے ہی ردھم آتا ہے،اس کے ساتھ صبر وتحمل کیلیے بھی پوری کوشش کرتا ہوں، سلو پڑنے پر میں اپنا کنٹرول کھو بیٹھتا ہوں جس سے بولنگ شارٹ اور لوز ہوجاتی ہے۔

انھوں نے کہا کہ شین وارن نے مجھے جو مشورے دیے ان پر فارغ وقت میں پریکٹس کروں گا، مگر ایک بات یقینی ہے کہ اپنے فطری انداز میں کسی بھی قسم کی تبدیلی نہیں لاوں گا۔یاسر شاہ نے مزید کہا کہ ٹیم مینجمنٹ کو مجھ سے بہت زیادہ توقعات وابستہ ہوتی ہیں، بھرپور سپورٹ سے مجھے زیادہ سے زیادہ اچھی کارکردگی پیش کرنے کی تحریک ملتی ہے