نائبچینی وزیراعظم کا پاکستان میں چین کے منصوبوں کی نگرانی کیلئے اعلیٰ سطحی کمیٹی تشکیل دینے پر رضا مندی کا اظہار

بیجنگ ( اُردو پوائنٹ اخبار تازہ ترین۔ 25 اگست۔2015ء ) چین کے نائب وزیراعظم ژانگ ہاؤلی نے پاکستان میں چینی سرمایہ کاری سے زیر تعمیر ترقیاتی منصوبوں کی نگرانی کے لئے اپنی سربراہی میں اعلیٰ سطحی کمیٹی تشکیل دینے پر رضا مندی کا اظہارکیا ہے جبکہ وزیر اعلیٰ پنجاب نے کہاہے کہ چین کے تعاون پر مبنی منصوبوں کو دن رات محنت کر کے مکمل کرینگے، چینی قیادت کے تاریخی اقتصادی پیکیج کے ذریعے پاکستان پر کئے گئے اعتماد پر پورا اتریں گے،چین کے صدر کے حالیہ دورہ اسلام آباد نے پاک چین دوستی کو نئی رفعتوں سے آشنا کیا ہے۔

بیجنگ کے گریٹ ہال میں وزیراعلیٰ پنجاب محمد شہبازشریف اور چین کے نائب وزیراعظم کے درمیان ملاقات ہوئی ۔ وفاقی وزیر منصوبہ بندی وترقیات احسن اقبال ، چین میں پاکستان کے سفیر مسعودخالد، وزیراعظم کے خصوصی نمائندے ظفر محمود ، مشیر صحت خواجہ سلمان رفیق اور چیئرمین لاہور ٹرانسپورٹ کمپنی خواجہ احمد حسان بھی ا س موقع پر موجود تھے- اعلیٰ سطح کی اس کمیٹی کو تشکیل دینے کی تجویز وزیراعلیٰ پنجاب محمد شہبازشریف کی طرف سے پیش کی گئی تھی-چین کے نائب وزیراعظم ژانگ ہاؤلی نے وزیراعلیٰ پنجاب محمد شہبازشریف سے گفتگو کرتے ہوئے کہاکہ میں پاکستان میں چینی تعاون پر مبنی منصوبوں کی نگرانی خود کروں گا اورمجوزہ کمیٹی میں چین کے مختلف مالیاتی اداروں اور متعلقہ محکموں کے سینئر حکام شامل ہوں گے-انہوں نے کہاکہ دنیا کے کئی ممالک میں چینی تعاون سے ترقیاتی منصوبے زیر تکمیل ہیں لیکن پاکستان کے ساتھ چین کے کثیر الجہت تعاون کی دوسری مثال موجود نہیں-چینی نائب وزیراعظم نے کہا کہ اس وقت چین پاکستا ن میں توانائی، ٹرانسپورٹ، انفراسٹرکچر ، صحت اور دیگر شعبوں میں وسیع تعاون کررہاہے - انہوں نے کہاکہ پاک چین اقتصادی شاہراہ کی تکمیل سے صرف چین سے ہی نہیں بلکہ دنیا کے 60دوسرے ملکوں سے بھی پاکستان کا اقتصادی ، تجارتی اور معاشی رابطہ ممکن ہو سکے گا-ژانگ ہاؤلی نے کہاکہ وزیراعظم محمد نوازشریف کی حکومت پاکستان کے عوام کے لئے بہت اچھے کام کرر ہی ہے او رہماری نیک تمنائیں ان کے ساتھ ہیں-چینی نائب وزیراعظم نے وزیراعلیٰ محمد شہبازشریف سے گفتگو کرتے ہوئے کہاکہ پنجاب کی خوش قسمتی ہے کہ اسے شہبازشریف جیسا انتھک او رمحنتی لیڈر میسر ہے-انہوں نے پنجاب میں چینی تعاون پر مبنی منصوبوں پر پیشرفت کو سراہا- وزیراعلیٰ پنجاب محمد شہبازشریف نے چینی نائب وزیراعظم ژانگ ہاؤلی سے ملاقات کے دوران گفتگو کرتے ہوئے کہاکہ چینی قیادت نے تاریخی اقتصادی پیکیج کے ذریعے پاکستان پر جس اعتماد کا اظہار کیا ہے،پاکستان کی قیادت او رعوام اس پر پورا اتریں گے-انہوں نے کہاکہ ہم چین کے تعاون پر مبنی منصوبوں کو دن رات محنت کر کے مکمل کریں گے -وزیراعلیٰ پنجاب نے کہاکہ چین کے صدر کے حالیہ دورہ اسلام آباد نے پاک چین دوستی کو نئی رفعتوں سے آشنا کیا ہے-چینی نائب وزیراعظم سے وزیراعلیٰ پنجاب محمد شہبازشریف کی ملاقات کا طے شدہ دورانیہ آدھا گھنٹہ تھا لیکن یہ ملاقات تقریباً ڈیڑھ گھنٹہ جاری رہی- وزیراعلیٰ پنجاب محمد شہبازشریف نے آج بیجنگ میں چین کے ایگزم بینک کے صدر لی روگو سے ملاقات کی،جس میں پاکستان میں سرمایہ کاری کرنے والی چینی سرمایہ کار کمپنیو ں کیلئے وسائل کی جلد فراہمی پر اتفاق کیا گیا- وزیراعلیٰ پنجاب محمد شہبازشریف نے اس موقع پر گفتگو کرتے ہوئے کہا کہ یقین ہے کہ چینی سرمایہ کاروں کیلئے وسائل میں کمی نہیں آنے دی جائے گی-چین کے تعاون سے لگنے والے منصوبوں کے معیار،شفافیت اور تیزرفتاری سے تکمیل پر کوئی سمجھوتہ نہیں کیا جائے گا،ساہیوال میں چین کے تعاون سے لگنے والے کوئلے سے بجلی پیدا کرنے کے منصوبے پر تیزی سے عملدر آمد کیا جارہا ہے جبکہ دیگر منصوبوں پر بھی کام جاری ہے اور میں منصوبوں پر پیش رفت کا ذاتی طور پر جائزہ لے رہا ہوں اور منصوبوں کی بروقت تکمیل کیلئے تمام ممکنہ اقدامات کیے گئے ہیں۔

(جاری ہے)

صدر ایگز م بینک صدر لی روگو نے وزیراعلیٰ پنجاب محمد شہبازشریف سے گفتگو کرتے ہوئے کہا کہ چینی منصوبوں کیلئے ہنگامی طورپر وسائل فراہم کیے جارہے ہیں۔ صدر ایگزم بینک نے وزیراعلیٰ کویقین دلایا کہ جلد سے جلد وسائل کی فراہمی ممکن بنائی جائے گی اوراس ضمن میں ہر ممکن تعاون کیا جائے گا۔ وفاقی وزیر احسن اقبال نے کہاکہ چین کا خصوصی ترقیاتی پیکیج وزیراعظم محمد نوازشریف کی قیادت پر بھرپور اعتماد کا اظہار ہے-قبل ازیں وزیراعلیٰ پنجاب محمد شہبازشریف سے آج بیجنگ میں چین کے صوبے شین ڈونگ کے نائب گورنرژاہ زنگ( Mr.Xia Zing)نے اعلی سطح کے وفد کے ہمراہ ملاقات کی اورشین ڈونگ کو پنجاب کے ساتھ جڑواں صوبہ قرار دینے کی پیشکش کی -وزیراعلیٰ پنجاب محمد شہبازشریف نے شین ڈونگ صوبے کے نائب گورنر سے گفتگو کرتے ہوئے کہا کہ شین ڈونگ کو پنجاب کے ساتھ جڑواں صوبہ بنانا ہمارے لئے اعزاز ہے اورشین ڈونگ جیسے ترقی یافتہ صوبے سے ہم بہت کچھ سیکھ سکتے ہیں-