پاکستان سے تعلقات بہتر بنانے میں دلچسپی رکھتے ہیں تاہم ماحول کی تشکیل اور باہمی روابط کو معمول پر لانا پاکستان کی ذمہ داری ہے،وزیراعظم نریندرا مودی کی قیادت میں بھارت کے اپنے پڑوسی سے تعلقات بہتر ہوئے ہیں،چین کے ساتھ سرحدی تنازعات ہیں جو حل طلب ہیں۔ اس کے علاوہ بھی چین سے متعلق متعدد مسائل موجود ہیں جو تحفظات کا باعث ہیں ،بھارتی وزیر خزانہ ارون جیٹلی کا نیویارک کے تھنک ٹینک کونسل آن فارن ریلیشن میں خطاب

جمعہ 19 جون 2015 23:56

نیویارک(اُردو پوائنٹ اخبارتازہ ترین - آئی این پی۔19 جون۔2015ء) بھارتی وزیر خزانہ ارون جیٹلی نے کہا ہے کہ ہم پاکستان سے تعلقات بہتر بنانے میں دلچسپی رکھتے ہیں تاہم دوطرفہ روابط میں پیشرفت کا انحصار اس بات پر ہے کہ پاکستان کی جانب سے کس قسم کی " اشتعال انگیزی" سامنے آتی ہے۔عالمی میڈیا کے مطابق امریکا کے دس روزہ دورے کے دوران اورن جیٹلی نے نیویارک کے ایک تھنک ٹینک کونسل آن فارن ریلیشن میں خطاب کرتے ہوئے کہا کہ پاک بھارت تعلقات میں بہتری کے لیے ماحول کی تشکیل اور باہمی روابط کو معمول پر لانا پاکستان کی ذمہ داری ہے۔

ان کا کہنا تھا کہ وزیراعظم نریندرا مودی کی قیادت میں بھارت کے اپنے پڑوسی سے تعلقات بہتر ہوئے ہیں۔اورن جیٹلی کا کہنا تھا " ماضی قریب میں بھارت مشکلات میں پھنسے پڑوسی ممالک کے درمیان پھنسا ہوا تھا اور وہاں سے متعدد مسائل بھارت میں در آئے۔

(جاری ہے)

انہوں نے چینی قیادت سے بے مثال تعلقات قائم کرنے پر بھی بھارتی وزیراعظم کو سراہا ۔ وزیراعظم نے چینی قیادت سے بہت اچھے تعلقات قائم کیے ہیں، ہمارے ان سے سرحدی تنازعات ہیں جو کہ حل طلب ہیں۔

اس کے علاوہ بھی چین سے متعلق متعدد مسائل موجود ہیں جو ہمارے لیے تحفظات کا باعث ہیں مگر کم از کم سرحد کے گرد کشیدہ صورتحال تو موجود نہیں۔خیال رہے کہ گزشتہ چند روز کے دوران پاکستان اوربھارت کے درمیان کئی گرماگرم بیانات سامنے آئے ہیں جس کے نتیجے میں دونوں ممالک کے درمیان تعلقات میں مزید بگاڑ آیا تاہم حالات میں اس وقت مثبت تبدیلی آئی جب بھارتی وزیراعظم نے اپنے پاکستانی ہم منصب میاں نواز شریف کو ٹیلیفون کرکے رمضان کی مبارک باد دی اور اس موقع پر پاکستانی ماہی گیروں کو رہا کرنے کا اعلان کیا۔

Facebook Twitter Google + Share on Whatsapp

متعلقہ عنوان :

مزید اہم خبریں