بالی ووڈ میں کسی بھی اداکار کا مذاق بنانا کوئی بڑی بات نہیں‘رشی کپور

رنبیر کپور اس وقت اپنے کرئیر کے مشکل ترین وقت سے گذر رہا ہے، جس سے اسے بہت کچھ سیکھنے کو ملے گا

اتوار 14 جون 2015 11:26

ممبئی (اُردو پوائنٹ اخبار تازہ ترین۔14جون۔2015ء)ہندوستان کی فلم انڈسٹری کے لیجنڈری اداکار رشی کپور کا کہنا ہے کہ بالی ووڈ میں کسی بھی اداکار کا مذاق بنانا کوئی بڑی بات نہیں، رنبیر کپور اس وقت اپنے کرئیر کے مشکل ترین وقت سے گذر رہا ہے، جس سے اسے بہت کچھ سیکھنے کو ملے گا۔یاد رہے کہ رواں سال ہونے والے آئیفا ایوارڈز میں بولی وڈ کے اداکاروں ارجن کپور اور رنویر سنگھ کی جانب سے اداکار رنبیر کپور کی فلموں میں مسلسل ناکامی کا مذاق اڑایا گیا تھا، جس کی وجہ یہ ہے کہ رنبیر کپور کی حال ہی میں ریلیز ہونے والی فلم ”بومبے ویلوٹ“ باکس آفس پر کامیابی حاصل کرنے میں ناکام ہوگئی تھی۔

اس فلم میں اداکارہ انشکا شرما کا نام ’روزی‘ رکھا گیا تھا جس پر دونوں اداکاروں کا کہنا تھا کہ رنبیر کا نام 'روٹی' ہونا چاہیے تھا کیوں کہ فلم نے ہدایت کار انوراگ کشپ کی روزی روٹی چھین لی ہے۔

(جاری ہے)

انڈین ایکسپریس کے مطابق اداکار رشی کپور کا اپنے لاڈلے بیٹے رنبیر کے مذاق کے بارے میں کہنا تھا کہ اس میں کوئی بڑی بات نہیں ہے، بالی ووڈ میں اداکاروں کا عموماً مذاق بنایا جاتا رہا ہے۔

انھوں نے مزید کہا کہ رنبیر اس وقت اپنے کریئر کے مشکل ترین دور سے گذر رہا ہے تاہم ان کی مسلسل فلاپ ہوتی فلمیں یقیناً ان کو بہت کچھ سکھائیں گی۔رشی کے مطابق رنبیر کپور نے اپنے کرئیر میں کافی غلطیاں بھی کی ہیں البتہ وہ بہت جلد پہلے کی طرح بولی وڈ کے کامیاب اداکاروں کی فہرست میں شمار ہو جائے گے۔