برسات کی آمد سے قبل تمام ندی نالوں کی صفائی کا کام مکمل کرنے کیلئے تمام تر دستیاب وسائل کو بروئے کار لایا جائے،سید محمد علی شاہ

ہفتہ 13 جون 2015 22:32

کراچی (اُردو پوائنٹ اخبار تازہ ترین۔ 13 جون۔2015ء) کمشنر کراچی کی ہدایت پر ڈپٹی کمشنر ضلع غربی سید محمد علی شاہ نے ایڈمنسٹریٹر بلدیہ غربی سجاد احمد میمن اور میونسپل کمشنر اشفاق احمد ملاح کے ہمراہ بلدیہ غربی میں جاری ندی نالوں کی صفائی کے جاری کام کا معائینہ کیا اس موقع پر گفتگو کرتے ہوئے ڈپٹی کمشنر نے کہا کہ برسات کی آمد سے قبل تمام ندی نالوں کی صفائی کا کام مکمل کرنے کیلئے تمام تر دستیاب وسائل کو بروئے کار لایا جائے خصوصا ندی نالوں اور اس کے اطراف رہائش پذیر افراد کو تجاوزات کے خاتمہ کیلئے تیار کیاجائے تاکہ ندی نالوں کی صفائی کا عمل قبل از وقت مکمل کیا جاسکے اور دوران برسات عوام کو جانی و مالی نقصانات سے محفوظ رکھا جاسکے اس موقع پر ایڈمنسٹریٹر نے ڈپٹی کمشنر کو انتظامیہ بلدیہ غربی کی جانب سے ندی نالوں کی صفائی کے حوالے سے کیئے جانے والے اقدامات پر بریفنگ دیتے ہوئے بتایا کہ بلدیہ غربی کے تینوں زونوں میں ندی نالوں کی صفائی کاکام برق رفتاری سے جاری ہے تمام تر ہلکی و بھاری مشینری کو بروئے کار لاکر ندی نالوں سے کچرہ و ملبہ نکالنے کے ساتھ ساتھ ٹھکانے لگانے کا عمل بھی تسلسل سے جاری ہے ندی نالوں سے تجاوزات کے خاتمہ کیلئے بھی اقدامات کو یقینی بنایا جارہا ہے جبکہ صفائی ستھرائی کی صورتحال کو بہتر بنانے کیلئے تمام علاقوں میں صفائی کا عمل بھر پور طریقہ سے جاری ہے کچرہ وملبہ کی منتقلی کیلئے تمام ہلکی وبھاری مشینری کوبروئے کار لایا جارہا ہے اس موقع پر انکے ہمراہ بلدیاتی افسران بھی موجود تھے۔