کراچی، سائیں سرکار کی 600سرکاری گاڑیاں غیرمتعلقہ افراد کے زیراستعمال ہونے کا انکشاف

کراچی(اُردو پوائنٹ اخبار تازہ ترین۔ 11 جون۔2015ء) سندھ سیکرٹریز کمیٹی کے اجلاس میں سائیں سرکار کی 600سرکاری گاڑیاں غیرمتعلقہ افراد کے زیراستعمال ہونے کا انکشاف ہوا ہے۔ اجلاس میں سرکاری ملازمتوں پر خواتین، اقلیتوں اور معذور افراد کے کوٹے پر عملدرآمد نہ ہونے کا نوٹس لے لیا گیا۔گزشتہ روزچیف سیکرٹری کے زیرصدارت سندھ سیکرٹریز کمیٹی کے اجلاس ہوا۔

اجلاس میں سندھ کے تمام محکموں کے سیکرٹریز، کمشنرز اور ڈپٹی کمشنرز شریک ہوئے۔ اجلاس میں بتایا گیا کہ وفاق سے ضم ہونے والے کنٹریکٹ اور ایڈ ہاک ملازمین کے بارے میں تاحال کوئی فیصلہ نہیں ہوا۔چیف سیکرٹر ی سندھ صدیق میمن نے تما م سیکرٹریز کو ایک ہفتے کے اندر کوٹے پر دی جانے والی نوکریوں سے متعلق رپورٹ طلب کر لی۔اجلاس میں انکشاف کیا گیا کہ سندھ میں ریٹائرڈ افسران اور غیرمتعلقہ افراد 600 سے زائد سرکاری گاڑیاں استعمال کررہے ہیں۔

(جاری ہے)

صرف یہی نہیں بلکہ 300 سے زائد گاڑیوں کافیول بھی سندھ سرکار کے ذمہ ہے جبکہ استحقاق نہ رکھنے والے افسران بھی وی آئی پی گاڑیوں کے مزے اڑا رہے ہیں۔چیف سیکرٹری نے سات روز کے اندر رپورٹ تیار کرکے گاڑیاں واپس واگزار کرانے کے احکامات جاری کردیئے اور ایسے افسران جن کو گاڑیوں کے استعمال کا استحقاق نہیں انہیں اظہار وجہ کا نوٹس جاری کرکے محکمانہ کارروائی کی احکامات بھی دے دیئے۔ذرائع کے مطابق کمشنر کراچی پورے اجلاس کے دوران نیند کے مزے لیتے رہے۔