قومی کرکٹ ٹیم کے بیٹنگ کوچ گرانٹ فلاور کو قربانی کا بکرا بنانے کا فیصلہ

چیئرمین پی سی بی نے گرانٹ فلاور کو عہدے سے ہٹا کر انضمام الحق کو کوچ مقرر کرنے کی تجویز پر غورشروع کر دیا

جمعہ 15 مئی 2015 17:29

لاہور(اُردو پوائنٹ اخبار تازہ ترین۔ 15 مئی۔2015ء) قومی کرکٹ ٹیم کے بیٹنگ کوچ گرانٹ فلاور کو قربانی کا بکرا بنانے کا فیصلہ کر لیا گیا، چیئرمین پی سی بی نے انہیں عہدے سے ہٹا کر انضمام الحق کو کوچ مقرر کرنے کی تجویز پر غورشروع کر دیا ۔میڈیا رپورٹس کے مطابق زمبابوے سے تعلق رکھنے والے گرانٹ فلاور کو گزشتہ سال اس وقت یہ عہدہ سونپا گیا تھا جب ٹیم کے کوچنگ ڈیو واٹمورعہدے سے الگ ہوئے تھے، پی سی بی نے وقار یونس کو ہیڈ کوچ مقرر کرنے کے ساتھ ساتھ گرانٹ فلاور کو ٹیم کا بیٹنگ کوچ مقرر کیا تھا۔

گرانٹ فلاور کی کوچنگ کے دوران پاکستانی ٹیم کی بیٹنگ میں کوئی تبدیلی نہیں آئی، ٹیم کو تب سے اب تک 6 ون ڈے سیریز میں شکست ہوئی ہے اور ان 6 میں سے 4 سیریز میں پاکستانی ٹیم کی ناقص بیٹنگ اس شکست کی وجہ بنی۔

(جاری ہے)

ذرائع کے مطابق چیئرمین پی سی بی زمبابوے کے خلاف سیریز سے قبل ہی گرانٹ فلاور کی جگہ انضمام الحق کو یہ ذمہ داری سونپنا چاہتے تھے تاہم اس فیصلے کو فی الحال موخر کر دیا گیا ہے۔

ٹیم کے سپن بولنگ کوچ مشتاق احمد کو انضمام الحق کا قریبی دوست سمجھا جاتا ہے اور ایسا خیال کیا جا رہا ہے کہ وہ انضمام الحق کو ٹیم کا بیٹنگ کوچ دیکھنا چاہتے ہیں۔ چیئرمین پی سی بی نے بھی اس سلسلے میں غور شروع کر دیا ہے جب کہ ہیڈ کوچ وقار یونس بھی انضمام الحق کے حوالے سے منظوری دے چکے ہیں۔ اگر گرانٹ فلاور کو ٹیم سے ہٹایا گیا تو پھر فیلڈنگ کوچ گرانٹ لیوڈن کا عہدہ بھی ختم کر دیا جائے گا، گرانٹ لیوڈن اور گرانٹ فلاور کا کنٹریکٹ جولائی میں ختم ہو رہا ہے تاہم پی سی بی دونوں کو ایک مہینہ پہلے ہی رخصت کرنے پر غور کر رہا ہے، اگر ایسا نہ کیا گیا تو بھی دونوں کے کنٹریکٹ میں توسیع کا امکان نہیں ہے۔