کراچی :ٹارگٹڈ آپریشن ، رینجرز پر حملے میں ملوث القاعدہ کمانڈر سمیت 5 دہشتگرد ہلاک

پیر 13 اپریل 2015 11:00

کراچی(اُردو پوائنٹ اخبار تازہ ترین۔13اپریل2015ء) کراچی کے علاقے اورنگی ٹاؤن میں انسداد دہشت گردی ڈیپارٹمنٹ سے مقابلے میں القاعدہ کراچی کے کمانڈر سمیت پانچ دہشت گرد مارے گئے ، دہشت گردوں کے قبضے سے تین خود کش جیکٹس ، پریشر ککر بم اور بھاری مقدار میں بارودی مواد اور اسلحہ بھی برآمد ہوا ہے ۔ کمین گاہوں میں چھپے دہشت گردوں پر قانون نافذ کرنے والے اداروں نے زمین تنگ کر رکھی ہے ۔

(جاری ہے)

آج علی الصبح انسداد دہشت گردی ڈیپارٹمنٹ نے دہشت گردوں کی موجودگی کی اطلاع پر اورنگی ٹاؤن کے علاقے خیر آباد میں چھاپہ مارا ، کارروائی کے دوران دہشت گردوں نے سی ٹی ڈی اہلکاروں پر فائرنگ شروع کر دی ۔ سی ٹی ڈی پولیس اور ملزموں کے درمیان آدھے گھنٹے تک فائرنگ کا سلسلہ جاری رہا ۔ پولیس کی جوابی فائرنگ سے پانچ دہشت گرد مارے گئے ، انچارج سی ٹی ڈی راجہ عمر خطاب نے میڈیا سے بات کرتے ہوئے بتایا کہ ہلاک ہونے والے دہشت گرد بم دھماکوں اور ٹارگٹ کلنگ میں ملوث تھے ، مارے گئے دہشت گردوں کے قبضے سے تین خود کش جیکٹس ، پریشر ککر بم اور بھاری مقدار میں بارودی مواد اور اسلحہ بھی برآمد ہوا ہے