حکومت نے پٹرولیم مصنوعات میں اضافہ کرکے عوام دشمنی کاثبوت دیا؛ضلعی صدر کسان بورڈ

فیصل آباد(اردو پوائنٹ تازہ ترین اخبار5اپریل ۔2015ء) کسان بورڈکے ضلعی صدرمیاں ریحان الحق ایڈووکیٹ نے کہاہے کہ حکومت نے پٹرولیم مصنوعات میں اضافہ کرکے عوام دشمنی کاثبوت دیاہے پوری دنیامیں پٹرول کی قیمتیںآ دھی رہ گئی ہیں لیکن ہمارے حکمران خسارہ پورے کرنے کے نام پرعوام کی جیبوں پرڈاکہ ڈال کراپنی تجوریاں بھررہے ہیں،پٹرولیم مصنوعات میں اضافہ کاسب سے زیادہ اثرزراعی معیشت پرہوتاہے،تیل کی قیمتوں میں اضافے کے ساتھ ہی زرعی مداخل کوخریدنے اورلے جانے اورزرعی مصنوعات کومنڈیوں میں لانے کے لئے کرایوں میں بے پناہ اضافہ کردیاجاتاہے ،ایسے اقدامات سے واضح ہوتاہے کہ پاکستان کی ریڑھ کی ہڈی زراعت کو توڑنے کی گھناونی کوشش کی جارہی ہے،انہوں نے کہاکہ ملکی آبادی کا68فیصد زراعت سے منسلک ہے جن کی زندگی ملک پرقابض اشرافیہ نے اجیرن بنادی ہے۔

(جاری ہے)

کسان اورمزدورملک کاسب سے زیادہ مظلوم طبقہ ہے جن کی زندگی سے سکون چھین لیاگیاہے۔کسان ساراساراسال محنت کرتاہے مگراس کی محنت کاپھل جاگیرداراورسرمایہ دارکھاتے ہیں اورکسان کے بچے بھوکے پیٹ سوتے ہیں۔انہوں نے کہاہے کہ پاکستان کے پاس سونااگلنے والی زرخیززمین اورمحنت کرنے والے کسان ہیں لیکن وہ نااہل اور کسان دشمن قیادت کی وجہ سے آلوپیازتک بیرون ملک سے درآمدکرنے پرمجبورہے۔

شوگرملوں،کاٹن ملوں اوررائس ملوں نے لوٹ ماراور کرپشن کی انتہاکررکھی ہے۔دھان اور کپاس کی فصلوں کواونے پونے خریدکرکسانوں کواربوں روپے کانقصان پہنچایاگیا،شوگرملوں نے اوچھے ہتھکنڈے استعمال کرکے ،کنڈوں میں ہیرپھیری کرکے اور حکومتی وعدالتی احکامات کے باوجودگنے کے حکومتی ریٹ سے کم خریدکر کریشن کے تمام سابقہ ریکارڈ توڑے ہیں اوراب گنے کے کاشتکاروں کوادائیگیاں نہ کرکے ان کامعاشی قتل عام کررہے ہیں۔

انہوں نے کہاکہ محنت کسان کرتاہے مگراس کاپھل ساہوکاراورسرمایہ دارکھاتے ہیں یہ صریح ظلم ہے جس کی کسی بھی صورت اجازت نہیں دی جاسکتی انہوں نے کہاکہ حکومت فوری طورپرپٹرولیم مصنوعات میں کیے جانے والے اضافہ واپس لے اور کسانوں کوریلیف دینے کے لئے کسان دوست پالیسیوں کااعلان کرے۔