آپریشن ضرب عضب نے طالبان کی کمر توڑ دی ، کالعدم تحریک طالبان تتر بتر ہوگئی ، دہشتگرد اپنی جانیں بچانے کیلئے بھاگ رہے ہیں ، دسمبر 2016ء تک تمام عارضی بے گھر افراد واپس چلے جائیں گے ، 81 ارب روپے کی لاگت سے متاثرہ علاقوں میں مارکیٹیں ، سکول ، سرکاری عمارات اور رہائشی کالونیاں تعمیر کی جائیں گی ، ڈیڑھ سال میں یہ عمل مکمل ہوگا ، 50 ارب متاثرین کو معاوضے کی ادائیگی اور 30 ارب گھروں کی تعمیر پر خرچ ہوں گے

اسلام آباد ( اُردو پوائنٹ اخبار تازہ ترین۔19مارچ۔2015ء ) قومی اسمبلی میں وفاقی وزیر برائے ریاستیں و سرحدی امور (سیفران ) جنرل (ر) عبدالقادر بلوچ نے کہا ہے کہ آپریشن ضرب عضب نے طالبان کی کمر توڑ دی ، ان کی تنظیم تتر بتر ہوگئی اور اس کے ارکان جان بچانے کیلئے بھاگ رہے ہیں ، دسمبر 2016ء تک تمام آئی ڈی پیز واپس جا چکے ، آئی ڈی پیز کے علاقوں میں حکومت متاثرین کے گھر بار ، مارکیٹیں ، سکول اور سرکاری عمارات کی تعمیر کا جامع پروگرام بنا چکی تاہم اس عمل میں ڈیڑھ سال لگے گا اور 81 ارب روپے لگیں گے ، 50 ارب متاثرین کو معاوضے کی ادائیگی اور 30 ارب گھروں کی تعمیر پر خرچ ہوں گے ۔

وفاقی وزیر جمعرات کو قومی اسمبلی میں عارضی بے گھر افراد کے معاملے پر جاری بحث سمیٹ رہے تھے ۔ انہوں نے کہا کہ متاثرین فاٹا کی دوبارہ آباد کاری پر تمام اسٹیک ہولڈرز کے ساتھ مشاورت ہوئی ہے ، یہ معاملہ ملک کے امن وامان سے متعلق ہے ، امن قائم ہوئے بغیر ملی تعمیر وترقی کو آگے نہیں بڑھایا جاسکتا ۔

(جاری ہے)

طالبان نے امن وامان تباہ کرنے کے اقدامات یے ، قرم ایجنسی کو چھوڑ کر تمام ایجنسیوں میں طالبان سرگرم تھے ، پشاور لاہور اور شکار پور سمتی بڑے شہروں میں دہشتگردی کے بڑے بڑے واقعات ہوئے ۔

ٹی ٹی پی نے ملکی امن وامان کو تہ و بالا کردیا ، امن کیلئے ضروری ہے کہ طالبان کا مکمل خاتمہ کردیا جائے ، افواج پاکستان اور سیاسی قیادت نے دہشتگردوں کے خاتمہ کیلئے تہیہ کر رکھا آپریشن ضرب عضب کامیابی سے جاری ہے ، ملک میں ضورر امن کا دوور واپس آئے گا ، فاٹا متاثرین کی باعزت واپسی اور آباد کاری کے بغیر امن وامان قائم کرنا مشکل ہوگا ، فاٹا متاثرین ملک کے محسن ہیں ، انہوں نے دہشتگردوں کے خلاف فوجی کارروائی کامیاب بناے کیلئے اپنے گھر بار خالی کیے ، ان کی قربانیاں ناقابل فراموش ہیں ، ٹی ٹی پی کی تنظیم ٹوٹ گئی اس کے لوگ تتر بتر ہوگئے اور وہ فرار ہورہے ہیں ، اب وہ مرحلہ آگیا کہ یہ لوگ واپس جائیں ، 28 لاکھ آئی ڈی پیز بنے ، 8 لاکھ واپس چلے گئے ، 16 مارچ سے نارتھ وزیرستان کے لوگ واپس جائیں گے ، کل باڑہ کے متاثرین واپس جائیں گے ۔

یہ عمل دسمبر 2016ء تک مکمل ہوگا ۔ ان کو گھر بار ، سکول ، مارکیٹیں ہسپتال بنا کردی جائیں گی ۔ اس میں ڈیڑھ دو سال لگے گا ۔ 81 ارب روپے ضرورت پڑیں گے ۔ 50 ارب معاوضہ دیا جائے گا ۔ واپس جانے والے ہر خاندان کو چھ ماہ کا راشن بھی دیا جائے گا ۔ 30 ارب روپے گھروں کی دوبارہ تعمیر کیلئے مختص کیے گئے ہیں ، آئی ڈی پیز کے معاملات کو خوش اسلوبی سے حل کیا گیا ۔

آئی ڈی پیز کے لئے جو کیمپ بنایا گیا تھا کے پی کے حکومت نے بھی متاثرین کی ریلیف میں زبردست کام کیا ۔ نارتھ وزیر ستان کے متاثرین چھ ماہ کے اندر واپس چلے جائیں گے ۔ ساؤتھ وزیرستان کے 11 ہزار خاندان واپس چلے گئے ، 36 ہزار خاندانوں کی واپسی جاری ہے ، ارکان اسمبلی بالخصوص عذرا افضل نے آئی ڈی پیز کی امداد کے حوالے مثبت تجاویز دیں ، آئی ڈی پیز ملک کے ہیرو ہیں ، ان کی قربانیوں کا بدلہ نہیں دیا جاسکتا ۔ جتنا معاوضہ دیا جائے وہ کم ہے ۔