پاکستان افغان حکومت اور طالبان کے درمیان مصالحت کی کوشش میں اپنا مثبت کردار ادا کر رہا ہے، خواجہ آصف

جمعہ 6 مارچ 2015 14:14

اسلام آباد(اُردو پوائنٹ اخبار تازہ ترین۔06مارچ۔2015ء) وزیر دفاع خواجہ آصف نے کہا ہے کہ پاکستان افغان حکومت اور طالبان کے درمیان مصالحت کی کوشش میں اپنا مثبت کردار ادا کر رہا ہے۔ ممکنہ مذاکرات اسی وقت کامیاب ہوں گے جب حقانی نیٹ ورک اور کوئٹہ شوریٰ بھی اس میں شامل ہوں۔ برطانوی نشریاتی ادارے نے اپنی رپورٹ میں کہا ہے کہ پاکستان افغان حکومت اور طالبان کے درمیان مذاکرات شروع کرانے کی ایک نئی کوشش میں مصروف ہے، اپنی نوعیت کے یہ پہلے مذاکرات رواں ماہ کسی وقت متوقع ہیں۔

بات چیت کے لیے چار مقامات پر غور کیا جا رہا ہے، جن میں اسلام آباد، کابل، متحدہ عرب امارات اور چین شامل ہیں۔ وزیر دفاع خواجہ آصف نے برطانوی نشریاتی ادارے کے ساتھ انٹرویو میں اس بات کی تصدیق کی رابطوں کا سلسلہ چل نکلا ہے۔

(جاری ہے)

تاہم ان کا کہنا تھا کہ یہ ایک نازک معاملہ ہے اور وہ اس میں قیاس آرائی نہیں کریں گے، کوشش یہی کی جارہی ہے کہ سب مذاکرات کی میز پر آئیں۔

خواجہ آصف کا کہنا تھا کہ مذاکرات کے لئے کسی ایک کو باہر رکھنے کا کوئی فائدہ نہیں ہوگا، افغان مذاکرات اسی صورت میں کامیاب ہوں گے جب حقانی نیٹ ورک اور اورکوئٹہ شوریٰ اس میں شامل ہوں، پاکستان اس مقصد میں اپنا کردار ادا کرے گا، اس میں ہمارا اگر کہیں اثر ہے تو ہم اسے مثبت طریقے سے ضرور استعمال کریں گے۔ انھوں نے اس بات کی تصدیق کی کہ رابطوں کا سلسلہ چل نکلا ہے تاہم یہ ایک نازک معاملہ ہے تو میں اس میں قیاس آرائی کرنے سے احتیاط کروں گا۔حقانی نیٹ ورک پر پابندی کے حکومت پاکستان کے اعلان کے بارے میں ایک سوال پر خواجہ آصف کا کہنا تھا کہ پاکستان نے کبھی اس گروپ کو تسلیم نہیں کیا تو پابندی کی بات نہیں بنتی، ہم تو اس گروپ کا خاتمہ چاہتے ہیں۔