اسحق ڈار نے رحمن ملک کے خط کا جواب دے دیا

خط کی نقول سراج الحق، جی جی جمالی اور جہانگیر ترین کو بھی بھجوا دی گئی ہیں

اتوار 1 مارچ 2015 18:01

ا سلام آباد(اردو پوائنٹ۔تازہ ترین اخبار .1 مارچ 2015) وفاقی وزیر خزانہ اسحاق ڈار کی جانب سے سیاسی جرگے کے کنونیئر رحمان ملک کے خط کا جواب دے دیا ہے۔سیاسی جرگے کے کنونیئر رحمان ملک نے تیئس فروری دو ہزار پندرہ کو اسحاق ڈار کو تحریک انصاف کے مطالبات اور جوڈیشل کمیشن کے قیام سے متعلق خط تحریر کیا تھا۔اسحاق ڈار کے خط کی نقول سراج الحق، جی جی جمالی اور جہانگیر ترین کو بھی بھجوا دی گئی ہیں، اسحاق ڈار نے اپنے خطا میں جوڈیشل کمیشن کے قیام کے حوالے سے سیاسی جرگے کی کوششوں کو سراہا ہے۔

(جاری ہے)

ان کا کہنا ہے کہ جرگے نے اس بات کا بالکل درست ادراک کیا ہے کہ ٹرم آف کنڈیشنز تحریک انصاف کے چیئرمین عمران خان کے الزامات سے متعلق ہونے چاہیے۔اسحاق ڈار نے کہا ہے کہ مذاکرات میں اب تک آنے والے تعطل کا جواز مسلم لیگ ن کو قرار نہیں دیا جاسکتا جیسا کہ پی ٹی آئی ظاہر کررہی ہے۔ مذاکرات میں تحریک انصاف کی پہلی اور دوسری تجاویز کو پہلے ہی تسلیم کیا جاچکا ہے۔ تاہم مسلم لیگ ن کو پی ٹی آئی کی تیسری تجویز پر تاحال تحفظات ہیں جو انتخابات میں دھاندلی کی تعریف کے حوالے سے ہے۔