لسبیلہ میں3 روزہ پولیو کی قومی مہم کا افتتاح

اوتھل( اُردو پوائنٹ تازہ ترین اخبار۔ 19 جنوری 2015ء) لسبیلہ میں3 روزہ پولیو کی قومی مہم کا افتتاح کردیا گیا محکمہ صحت کی موبائل ٹیمیں اپنے ٹارگٹ پر روانہ ہوچکی ہیں جو ضلع ہذا کے دور دراز اور دشوار گزار علاقوں میں گھر گھر جاکر 5 سال تک کے بچوں کو پولیو سے بچاؤ کے قطرے پلائیں گی لسبیلہ بھر میں تقریباً 1 لاکھ 5 ہزار سے زائد بچوں کو پولیو سے بچاؤ کے قطرے پلائے جائیں گے ان خیالات کا اظہار محکمہ صحت کے ڈسٹرکٹ آفیسر لسبیلہ ڈاکٹر غلام فاروق نے 3 روزہ پولیو کی قومی مہم کے افتتاح کے موقع پر صحافیوں سے بات چیت کرتے ہوئے کیا انہوں نے کہا کہ 2007سے لے کر آج تک لسبیلہ میں پولیو کا کوئی بھی کیس رجسٹرڈ نہیں ہوا ہے اور ہماری کوشش ہوگی کہ لسبیلہ کو پولیو جیسے ایک موذی مرض سے چھٹکارا دلائیں پولیو کی3 روزہ مہم 21جنوری تک جاری رہے گی محکمہ صحت کی موبائل ٹیمیں اپنے اپنے علاقوں کی جانب روانہ کی جا چکی ہیں جو گھر گھر جاکر 5 سال تک کے بچوں کو پولیو سے بچاؤ کے قطرے پلائیں گی والدین سے خصوصی اپیل کی جاتی ہے کہ وہ گھر گھر آنیوالی موبائل ٹیموں کے ساتھ تعاون کریں اور اپنے پھول جیسے بچوں کو پولیو سے بچاؤ کے قطرے ضرور پلوائیں انہوں نے کہا کہ ہماری کوشش ہے کہ ماضی کی طرح لسبیلہ کا مستقبل بھی پولیو جیسے ایک خطرناک مرض سے دور رہے پولیو کی افتتاحی تقریب میں PPHIکے سپورٹ پروگرام منیجر محمد اشرف بلوچ ،ایدھی بلوچستان کے انچارج ڈاکٹر عبدالحکیم لاسی ،ایم ایس ڈاکٹر عبدالواحد زہری ،سابق سٹی ناظم اوتھل محمد ابراہیم عادل ،جنرل کونسلر پرکاش کمار لاسی ،جنرل کونسلر حبیب اللہ جاموٹ ،ڈاکٹر تصدق ندیم ودیگر نے 5 سالہ بچوں کو پولیو کے قطرے پلاکر 5 روزہ قومی مہم کا افتتاح کیا اس موقع پر ایدھی بلوچستان کے انچارج ڈاکٹر عبدالحکیم لاسی نے صحافیوں کو بتایا کہ ایدھی ٹرسٹ کے بانی ملک کی نامور سماجی رہنما ایدھی عبدالستار کی ہدایت پر ڈسٹرکٹ لسبیلہ میں پولیو مہم کی معاونت میں ایدھی ایمبولینس فراہم کی گئی ہیں جو پولیو ٹیموں کے ساتھ ہونگے ۔