کسانوں کے بجلی کے کنکشن نہیں کاٹے جائیں گے،ڈاکٹر فرخ جاوید ،محکمہ زراعت کسانوں اور واپڈا کے درمیان پل کا کردار ادا کرے گا، صوبائی وزیر زراعت

فیصل آباد(اُردو پوائنٹ اخبار تازہ ترین۔22دسمبر 2014ء) کسان موجودہ بل ادا کر رہے ہیں انکے بجلی کے کنکشن نہیں کاٹے جائیں گے۔محکمہ زراعت کسانوں اور واپڈا کے درمیان پل کا کردار ادا کرے گا۔ بل ادا کرنے والے کاشتکاروں کو بجلی کی فراہمی اور کنکشن میں کسی قسم کی رکاوٹ نہ آنے پائے۔کاشتکاروں کو سہولت فراہم کرنے کیلئے حکومت 10روپے 35پیسے کے فلیٹ ریٹ پر بجلی فراہم کر رہی ہے۔

اس مد میں حکومت 22 ارب روپے کی سبسڈی دے رہی ہے جسے اگلے سال بھی جاری رکھا جائے گا۔ حکومت پنجاب کسانوں کے مفادات کے تحفظ کیلئے ہر اقدام اٹھائے گی۔ان خیالات کا اظہار صوبائی وزیر زراعت ڈاکٹر فرخ جاوید نے کسان اتحاد کی تمام تنظیموں، اسلام آباد سے آئے واپڈا کے اعلیٰ حکام اور پاور سپلائی کمپنیوں کے چیفس کے اجلاس کی صدارت کرتے ہوئے کیا۔

(جاری ہے)

ا جلاس میں سیکرٹری زراعت علی طاہر، اے ایس واپڈا عمر رسول، چیف ایگزیکٹو آفیسر لیسکوقیصر زمان، سی ای او میپکو مظفر علی، سی ایس ڈی لیسکو خالد محمود، ایڈیشنل سیکرٹری زراعت امیر خٹک، سپیشل سیکرٹری زرعی مارکیٹنگ ڈاکٹر صالح طاہر، ڈی جی زراعت توسیع ڈاکٹرمحمد انجم اور پاکستان کسان اتحاد کی تمام تنظیموں کے اعلیٰ عہدیداران نے شرکت کی۔

اجلاس کا مقصد کسانوں کے واپڈاسے متعلق مسائل پر تفصیلی بحث کے بعد ان مسائل کے حل تجویز کرنا تھا۔ ڈاکٹر فرخ جاویدنے کسان راہنماوٴں کے مسائل جانے اور انکے فوری حل کیلئے واپڈا کے اعلیٰ حکام کوہدایات دیں۔ انہوں نے متعلقہ پاور سپلائی کمپنیوں کے نمائندگان کو ہدایت کی کہ کسانوں کودرپیش مسائل کے حوالے سے تفصیلی جائزہ رپورٹ ایک ہفتے میں پیش کی جائے۔ سیکرٹری زراعت نے اجلاس کو بتایا کہ کاشتکاروں کے مسائل ہنگامی بنیادوں پر حل کرنے کیلئے حکومتی پالیسی واضح ہے۔ اجلاس سے خطاب میں واپڈا کے اعلیٰ حکام اور پاور سپلائی کمپنیوں کے چیفس نے یقین دہانی کروائی کے کسانوں کو ہر سطح پر سہولت فراہم کی جائے گی۔