بنگلہ دیشی وزیر اعظم کو قتل کرنے کا منصوبہ بے نقاب،جماعت المجاہدین حسینہ واجد کو قتل کرکے بنگلہ دیش میں بغاوت کرناچاہتی ہے،بھارتی کاؤنٹرٹیرارزم ایجنسی

ڈھاکہ/نئی دہلی(اُردو پوائنٹ اخبار تازہ ترین۔28اکتوبر 2014ء) بھارت نے بنگلہ دیش کی وزیر اعظم شیخ حسینہ واجد کے قتل کے منصوبے کا انکشاف کیاہے،بھارتی میڈیاکے مطابق بھارت کی کاونٹر ٹیررزم ایجنسی کے ایک اہلکار نے بتایاکہ بنگلہ دیش کی وزیر اعظم کے قتل کا منصوبہ ایک کالعدم تنظیم نے بنایا تھا جس کے بعد ملک میں بغاوت ہو جاتی۔بھارت بنگلہ دیش کو اس سازش کے پیچھے موجودجماعت المجاہدین کی جانب سے تیار کیے گئے منصوبے کے دستاویزی ثبوت فراہم کرے گا۔

جماعت المجاہدین کی جانب سے متعدد دہشت گردانہ کارروائی پہلے بھی کی جا چکی ہیں۔بنگلہ دیش کی جانب سے سرکاری طور پر اس سازش کے حوالے سے کوئی موقف سامنے نہیں آیا البتہ وزیر اعظم شیخ حسینہ واجد کی سیکورٹی مزید سخت کر دی گئی ہے۔

(جاری ہے)

شیخ حسینہ واجد کے قتل کی مبینہ سازش اس وقت سامنے آئی جس ہندوستان کے مشرقی حصے میں واقع مغربی بنگال میں ایک گھر میں بم دھماکہ ہوا جس کے بارے میں پولیس اور دیگر اداروں نے بتایا کہ اس گھر میں دھماکہ خیز مواد بنایا جاتا تھا اور دھماکے میں جماعت المجاہدین کے 2 عسکریت پسند بھی ہلاک ہوئے جن کا تعلق بنگلہ دیش سے تھا اور وہ ہندوستان میں اس گھر کو سیف ہاوس کے طور پر استعمال کر رہے تھے۔

بھارت کی مرکزی وزارت داخلہ کے ایک سینئر اہلکار کے مطابق ملک کی سیاسی رہنما کو نشانہ بنانے کے بعد جمہوری نظام کو ختم کرنے کا منصوبہ بنایا گیا تھا۔نام ظاہر کرنے کی شرط پر اس اہلکار نے یہ بھی بتایا کہ یہ پورا منصوبہ ہندوستان کی سرزمین پر بنایا گیا تھا اگر یہ حملہ ہو جاتا تو اس کا ذمہ دار بھی انڈیا کو قرار دیا جاتا۔