مصطفیٰ قریشی نے عمران خان کے مطالبات کی حمایت کردی

منگل 28 اکتوبر 2014 21:47

لاہور(اُردو پوائنٹ اخبار تازہ ترین۔28اکتوبر۔2014ء) پاکستان کے معروف اداکار مصطفیٰ قریشی نے عمران خان کے مطالبات کی حمایت کر دی، تحریک انصاف میں شمولیت کا امکان۔نجی ٹی وی سے خصوصی گفتگو میں مصطفیٰ قریشی کا کہنا تھا کہ مجھے پیپلز پارٹی کی موجودہ پالیسیوں پر تحفظات ہیں۔ موجودہ پیپلز پارٹی سابق وزرائے اعظم ذوالفقار علی بھٹو اور محترمہ بینظیر بھٹو کی جماعت نہیں رہی۔

ان کا کہنا تھا کہ مجھے عمران خان میں ذوالفقار علی بھٹو نظر آتا ہے۔

(جاری ہے)

پاکستان تحریک انصاف کے چیئرمین عمران خان جب کنٹینر پر کھڑے ہو کر جب امریکا کو للکار رہے تھے تو مجھے ذوالفقار علی بھٹو یاد آ گئے۔ انہوں نے کہا کہ وہ عمران خان کے مطالبات کی حمایت کرتے ہیں تاہم تحریک انصاف میں شمولیت کا ابھی فیصلہ نہیں کیا۔ واضع رہے کہ مصطفیٰ قریشی کا شمار پاکستان فلم انڈسٹری کے صف اول کے اداکاروں میں ہوتا ہے۔

مشہور زمانہ پنجابی فلم مولا جٹ میں ان کا کردار نوری نت آج بھی فلم بینوں کے ذہنوں میں تازہ ہے۔ مصطفیٰ قریشی 11 مئی 1940 کو حیدر آباد سندھ میں پیدا ہوئے۔ مصطفیٰ قریشی نے ریڈیو پاکستان حیدر آباد سے اپنے فنی سفر کا آغاز کیا تھا۔ وہ ریڈیو پاکستان کراچی میں بھی بطور ڈیوٹی افسر اور انائونسر خدمات انجام دیتے رہے۔