وزیراعلیٰ خیبرپختونخوا کی قیادت میں تحریک انصاف کا قافلہ اسلام آباد پہنچ گیا

جمعرات 14 اگست 2014 23:07

اسلام آباد(اُردو پوائنٹ اخبار تازہ ترین۔14اگست۔2014ء) وزیراعلیٰ خیبرپختونخوا پرویز خٹک کی قیادت میں تحریک انصاف کا قافلہ اسلام آباد پہنچ گیا جہاں ان کے ہمراہ ہزاروں کی تعداد میں کارکن موجود ہیں۔نجی ٹی وی کےمطابق وزیراعلیٰ خیبرپختونخوا پرویز خٹک سخت سکیورٹی میں خیبرپختونخوا سے اسلام آباد پہنچے جہاں ان کے ہمراہ تحریک انصاف کے کارکنوں کی بڑی تعداد موجود ہے، تحریک انصاف کے ہزاروں کارکنان گاڑیوں اور موٹرسائیکلوں پر وزیراعلیٰ کے ہمراہ اسلام آباد کے ٹول پلازہ پہنچے تو انہیں سڑک بند ملی جس پر کنٹینرز کھڑے کئے گئے تھے، وزیراعلیٰ کی جانب سے کنٹینر ہٹانے کے لیے آئی جی اسلام آباد سے رابطہ کیا گیا جس پر آئی جی نے انہیں کنٹینر ہٹانے کی یقین دہانی کرائی، اسلام آباد انتظامیہ کی جانب سے کنٹینر نہ ہٹانے کے بعد وزیراعلیٰ خیبرپختونخوا نے کارکنان کو کنٹینر ہٹانے کا حکم دیا جس کے بعد کارکنان نے سڑک پر لگے کنٹینروں کو ہٹا کر راستہ کھول دیا۔

(جاری ہے)

اس سے موقع پر نجی ٹی وی سے خصوصی گفتگو کرتے ہوئے وزیراعلیٰ خیبرپختونخوا کا کہنا تھا کہ عام انتخابات میں مسلم لیگ(ن) نے دھاندلی کے ذریعے حکومت بنائی جس کے خلاف سارا پاکستان نکل آیا ہے اور اب ہم انہیں بتانا چاہتے ہیں کہ دھاندلی کی حکومت نہیں چلنے دیں گے۔ انہوں نے کہا کہ ہم اپنے مطالبات منوا کر ہی اسلام آباد سے اٹھیں گے اور حکمرانوں کا تختہ الٹ کر ہی واپس آئیں گے۔