جسٹس ناصرالملک نے بطور چیف جسٹس آف پاکستان عہدے کا حلف اٹھا لیا

اتوار 6 جولائی 2014 12:07

اسلام آباد(اُردو پوائنٹ اخبار تازہ ترین۔6جولائی۔2014ء) جسٹس ناصرالملک نے ملک کے بطور 22 ویں چیف جسٹس آف پاکستان کی حیثیت سے عہدے کا حلف اٹھا لیا۔چیف جسٹس تصدق حسین جیلانی پاکستان کے21ویں چیف جسٹس کی حیثیت سے65 سال کی عمر تک پہنچنے کے بعد ریٹائر ہوگئےجس کے بعد نئے نامزد چیف جسٹس ناصر الملک نے ایوان صدر میں منعقدہ تقریب میں صدر ممنون حسین سے عہدے کا حلف لیا۔

حلف برداری تقریب میں وزیراعظم نواز شریف کے علاوہ تینوں مسلح افواج کے سربراہان ، چیئرمین جوائنٹ چیف آف اسٹاف کمیٹی، چیئرمین سینیٹ نیئر بخاری ، وفاقی وزرا، جمعیت علما اسلام (ف) کے سربراہ مولانا فضل الرحمان اور سپریم کورٹ کے ججز نے بھی شرکت کی۔جسٹس ناصرالملک 8 اگست 1950 کو خیبر پختونخوا کے ضلع سوات میں پیدا ہوئے۔

(جاری ہے)

انہوں نے انر ٹیمپل ان لندن سے 1976 میں بار ایٹ لاء کی ڈگری حاصل کی،نئے چیف جسٹس نے ایڈووکیٹ جنرل خیبر پختونخوا اور چیف جسٹس پشاور ہائیکورٹ کے طور پر بھی فرائض سرانجام دیے ہیں۔

جسٹس ناصرالملک ان 7 ججز میں شامل تھے جنھوں نے 3 نومبر2007 کو پی سی او کیخلاف حکم امتناع جاری کیا تھا اور اعلیٰ عدلیہ کے ججوں کو پی سی او کے تحت حلف اٹھانے سے روکا تھا۔ جسٹس ناصر الملک کی ریٹائرمنٹ پر اگلے سال اگست میں جسٹس جواد ایس خواجہ محض 24 دن کیلیے چیف جسٹس بنیں گے۔