سیکیورٹی خدشات کے پیش نظر ملک کے تمام بڑے شہروں میں فوج تعینات کرنے کا فیصلہ

اسلام آباد(اُردو پوائنٹ تازہ ترین اخبار۔ 16جون 2014ء) شمالی وزیرستان میں دہشت گردوں کے خلاف آپریشن کے بعد سکیورٹی خدشات کے پیش نظر ملک کے تمام بڑے شہروں میں فوج تعینات کرنے کا فیصلہ کیا گیا ہے۔ وزارت داخلہ نے شمالی وزیرستان میں جاری آپریشن کے بعد دہشت گردوں کی جانب سے ممکنہ رد عمل اور سکیورٹی خدشات کے پیش نظر چاروں صوبائی دارالحکومت سمیت ملک کے تمام بڑے شہروں میں فوج تعینات کرنے کا اصولی فیصلہ کرلیا ہے۔

فوج کو مختلف شہروں کے حساس مقامات پر تعینات کیا جائے گا جبکہ فوج ریزرو فورس کے طور پر کام کرے گی۔ ذرائع کا کہنا ہےکہ حساس مقامات کی سکیورٹی کے لئے بھی تین حصار بنائے جائیں گے جن میں پہلا حصار پولیس دوسرا رینجرز اور ایف سی جبکہ تیسرا حصار پاک فوج کے جوانوں پر مشتمل ہوگا۔

(جاری ہے)

ذرائع نے مزید بتایا کہ فوج کسی بھی ناخوشگوار واقعے کے وقت سول آرمڈ فورسز کی مدد کے لئے کوئیک رسپانس فورس کے طور پر کام کرے گی جبکہ انٹیلی جنس رپورٹ پر سول لاءانفورسمنٹ کے ساتھ مل کر کارروائی بھی کرے سکے گی۔

دوسری جانب ملک کے بڑے شہروں میں فوج کی تعیناتی کے فیصلے کے ساتھ کراچی میں ملیر کینٹ سے فوجی دستوں کی روانگی کا عمل شروع کردیا گیا ہے جنہیں شہر کے حساس مقامات پر تعینات کیا جائے گا۔ ذرائع کا کہنا ہے کہ فوجی دستوں کی تعیناتی کا عمل رات تک جاری رہے گا جبکہ دیگر شہروں میں بھی فی الفور فوج تعینات کی جائے گی۔

واضح رہے کہ حکومت کی جانب شمالی وزیرستان میں دہشت گردوں کے خلاف فوجی آپریشن شروع کردیا گیا ہے جس کے بعد دہشت گردوں کی جانب سے ممکنہ حملوں کے پیش نظر ملک بھر میں سکیورٹی کے انتظامات کو سخت کردیا گیا ہے۔