سینیٹ فنانس کمیٹی نے اتفاق رائے سے سال 2014-15 کیلئے 1539 ملین روپے بجٹ کی منظوری دی

بدھ 16 اپریل 2014 19:56

اسلام آباد(اُردو پوائنٹ اخبار تازہ ترین۔16اپریل۔2014ء) سینیٹ فنانس کمیٹی نے اتفاق رائے سے سال 2014-15 کیلئے 1539 ملین روپے بجٹ کی منظوری دی ۔سینیٹ فنانس کمیٹی کا 25 واں اجلاس چیئرمین سینیٹ سید نیئر حسین بخاری کی صدارت میں ہوا ۔ اجلاس میں ڈپٹی چیئرمین سینیٹ صابر علی بلوچ ، سینیٹ میں قائد ایوان سینیٹرراجہ محمد ظفر الحق ، قائد حزب اختلاف سینیٹر چوہدری اعتزاز احسن ،سینیٹر حاجی محمد عدیل ،سینیٹر کرنل ریٹائرڈ سید طاہر حسین مشہدی ،سینیٹر مولانا عبدالغفور حیدری ، سینیٹر مشاہد حسین سید اور سیکرٹری سینیٹ امجد پرویز ملک نے شرکت کی ۔

اس موقع پر وزارت خزانہ اور آڈیٹر جنرل کے نمائندے بھی موجود تھے۔فنانس کمیٹی نے حکومت کے اعلان کردہ الاؤنس کے مطابق سینیٹ ملازمین کو بھی20فیصد سپیشل پارلیمنٹ ہاؤس الاؤنس دینے کی بھی منظوری دی۔

(جاری ہے)

سیکرٹری امجد پرویز ملک نے کمیٹی کو سینیٹ اخراجات کے بارے میں بریفنگ دی اور کہا کہ مالیاتی قواعد کو بالخصوص پیش نظر رکھا جاتا ہے۔چیئرمین سینیٹ نیئر حسین بخاری نے کہا کہ سینیٹ فنانس کمیٹی خود مختار ہے وہ کثرت رائے سے فیصلے کر سکتی ہے ۔

سینیٹر حاجی عدیل نے تجویز پیش کی کہ ایک ذیلی کمیٹی تشکیل دی جائے جو اخراجات پر نظر رکھے ۔ چیئرمین سینیٹ نے کمیٹی کو بتایا کہ تمام اخراجات کا انٹرنل اور ایکسٹرنل آڈٹ باقاعدگی سے ہوتا ہے اور تمام مالیاتی قواعد ملحوظ خاطر رکھے جاتے ہیں ۔فنانس کمیٹی نے پرنٹنگ اینڈپبلیکشن کیلئے گریڈ 18 کی ایک مستقل پوسٹ کی بھی منظوری دی۔ سینیٹر کرنل (ر) طاہر حسین مشہدی نے تجویز دی کہ سینیٹ کے ریٹائرڈ ہونے والے چیئرمین ،ڈپٹی چیئرمین ، قائد ایوان اور قائد حزب اختلاف کو ریٹائرمنٹ کے بعد اسلام آبا د کے دورے پر کر ٹسی پروٹوکول دیا جائے۔

متعلقہ عنوان :