اگر طالبان سے مذاکرات ناکام ہوئے تو ملکی بقاء کو خطرہ ہے، خواجہ آصف

ہفتہ 15 مارچ 2014 14:33

سیالکوٹ(اُردو پوائنٹ تازہ ترین اخبار۔ 15مارچ 2014ء) وزیر دفاع خواجہ آصف نے کہا ہے کہ اگر حکومت اور طالبان کے درمیان جاری مذاکرات ناکام ہوگئے تو ملکی بقاء کو خطرہ ہے۔سیالکوٹ بار ایسوسی ایشن میں وکلا سے خطاب کرتے ہوئے وزیر دفاع خواجہ آصف کا کہنا تھا کہ اس وقت ملکی معیشت بحران کا شکار ہے، اگر معیشت بحال ہوگئی تو امان و امان قائم کرنے میں مدد ملے گی تاہم اگر طالبان کے ساتھ جاری مذاکرات ناکام ہوگئے تو ملکی بقاء کو خطرہ ہے۔

(جاری ہے)

پرویز مشر ف سے متعلق خواجہ آصف کا کہنا تھا کہ وردی میں بڑھکیں مارنے والا شخص آج مقدمات کا سامنا کرنے کے بجائے اسپتال میں چھپ کر بیٹھا ہوا ہے۔

وزیر دفاع نے کہا کہ عدلیہ کی بحالی کے لئے اگر وزیر اعظم نواز شریف باہر نہ نکلتے تو کبھی بحال نہ ہوتی، جس وقت نواز شریف سڑکوں پر تھے اس وقت تمام بڑے بڑے لیڈر چھپ کرکے بیٹھے ہوئے تھے۔ اس موقع پر خواجہ آصف نے وزیر اعظم نواز شریف کی طرف سے سیالکوٹ بار ایسوسی ایشن کےلئے 50 لاکھ روپے فنڈ کا بھی اعلان کیا۔