مختلف علاقوں میں بارش برفباری کے باعث موسم کی شدت میں پھر اضافہ ، شہریوں نے ایک بار پھر گرم کپڑے نکال لئے

اسلام آباد(اُردو پوائنٹ تازہ ترین اخبار۔ 10مارچ 2014ء) وفاقی دارالحکومت اسلام آباد ، گلگت بلتستان اور آزاد کشمیر سمیت مختلف علاقوں میں بارش برفباری کے باعث موسم کی شدت میں ایک بار پھر اضافہ ہوگیا ، شہریوں نے ایک بار پھر گرم کپڑے نکال لئے ، مری میں ایک بار پھر برف باری کا سلسلہ شروع ہوگیا ، سیاح لطف اندوز ہوتے رہے ، برف نے ہر منظر کو اپنی لپیٹ میں لے لیا جبکہ محکمہ موسمیات نے کہا ہے کہ آئندہ چوبیس گھنٹوں کے دوران گلگت بلتستان، کشمیر،اسلام آباد، بالائی پنجاب میں بارش اور مری، کالام اور مالم جبہ میں برف باری کا امکان ہے۔

(جاری ہے)

محکمہ موسمیات کے مطابق گلگت بلتستان کے علاقے غذر اور استور میں گزشتہ دو دن سے وقفے وقفے سے برفباری ہوئی جس نے نظام زندگی مفلوج کردیا پہلے سے بند زمینی راستے ابھی کھلے نہیں تھے کہ مزید برفباری نے شہریوں کی مشکلات میں اضافہ کردیا خوراک، دواؤں اور پینے کے پانی کی قلت میں اضافہ ہوگیا جبکہ خشک سردی سے لوگ بیماریوں میں مبتلا ہوئے بلوچستان کے علاقوں قلات، زیارت اور پشین میں ہلکی برفباری ہوئی اور ٹھنڈی ہوائیں چلتی رہیں ادھر پنجاب میں بھی گزشتہ روز کی بارش کے بعد ہلکی سردی برقرار رہی ادھر ملکہ کوہسارمری میں برفباری کا سلسلہ جاری رہاسیاح رات کو برفباری کا مزہ لینے سے باز نہیں آئے، شہریوں نے گرم کپڑے نکال لیے برف نے ہرمنظر کواپنی لپیٹ میں لے لیا محکمہ موسمیات کے مطابق آئندہ چوبیس گھنٹوں کے دوران گلگت بلتستان، کشمیر،بالائی خیبر پختونخواہ مالاکنڈ، ہزارہ، پشاور ، کوہاٹ ،لاہور اورگوجرانوالہ ڈویژن سمیت بالائی پنجاب میں اکثر مقامات گرج چمک کے ساتھ بارش ا ورپہاڑوں پربرفباری کا امکان ہے محکمہ موسمیات کے مطابق آئندہ دو سے تین روز کے دوران ملک کے مختلف علاقوں میں مزید بارشوں کی پیشنگوئی کی گئی ہے گزشتہ چوبیس گھنٹوں کے دوران ملک میں سب سے زیادہ بارش راولپنڈی میں 59 اسلام آباد 54 ،کوٹلی میں 52، منگلا 47،جہلم میں 39، مری میں 34،مظفر آباد ،بالاکوٹ میں 20 ،منڈی بہاؤالدین میں15 ملی میٹر ریکارڈ کی گئی۔