طالبان نے اہلکاروں کیساتھ جو سفاکانہ سلوک کیا ایسا تو بھارت نے بھی نہیں کیا، پرویزرشید

بدھ 19 فروری 2014 19:03

راولپنڈی(اُردو پوائنٹ اخبار تازہ ترین۔19فروری۔2014ء) وفاقی وزیر اطلاعات و نشریات پرویز رشید کا کہنا ہے کہ پاک فوج کی صلاحیتوں پر کسی کو شک نہیں ہونا چاہئے حکومت کی خواہش ہے خون خرابہ کے بغیر امن کی منزل حاصل کرلیں۔راولپنڈی میں میڈیا سے بات کرتے ہوئے پرویز رشید کا کہنا تھا کہ کوئی اس غلط فہمی میں نہ رہے کہ پاکستانی دفاعی اداروں کی صلاحتیں کسی بھی طور پر کم ہیں بلکہ دنیا ان اداروں کی کارکردگی کی معترف ہے۔

انہوں نے کہا کہ مغوی ایف سی اہلکاروں کے قتل کا واقعہ کب اور کہاں پیش آیا اس حوالے سے مکمل تفصیلات نہیں آئیں تاہم دہشت گردوں نے اہلکاروں کے ساتھ جو سلوک کیا کیا وہ شرعی تھا، اس قسم کی سفاکانہ کارروائی توبھارت جیسے دشمن نے بھی ہمارے 90 ہزارفوجیوں کے ساتھ نہیں کی تھی۔

(جاری ہے)

پرویز رشید نے کہا کہ طالبان ترجمان شاہد اللہ شاہد کو اگر کسی حوالے سے کوئی شکایت تھی تو مذاکراتی کمیٹی کو آگاہ کرنا چاہئے تھا، طالبان سوال کرنے سے پہلے قوم کے دکھوں کا جواب دیں، حکومت کو بھی طالبان سے مختلف معاملات پر شکایات ہیں، ایک سوال کے جواب پر انہوں نے کہا کہ ملک میں قانون کی حکمرانی قائم ہوچکی ہے اور اس سے کوئی نہیں بچ سکتا جبکہ سابق صدر پرویز مشرف کے ساتھ مکافات عمل جاری ہے تاہم قومی معاملات پر تمام سیاسی جماعتوں سے رابطے میں ہیں۔