حکمران ٹولہ ان قومی اداروں کو فروخت کرنے پر بضد ہے ،اسد عمر ، قومی اداروں کو نجکاری کے بجائے ایماندار ، محب وطن اور میرٹ کی بنیاد پر افسران کی تعیناتی کر کے اپنے پیروں پر کھڑا کیا جاسکتا ہے ،رکن قومی اسمبلی

کراچی (اُردو پوائنٹ اخبار تازہ ترین۔10 فروری ۔2014ء) پاکستان تحریک انصاف اسٹیل لیبر یونین کے زیر اہتمام پاکستان اسٹیل کی نجکاری کے خلاف گزشتہ روز گلشن حدید کاشانہ لان میں ایک سیمینار منعقد کیا گیا جس میں تحریک انصاف کے مرکزی سینئر رہنما و رکن قومی اسمبلی اسد عمر ، رکن صوبائی اسمبلی خرم شیر زمان ، مرکزی جوائنٹ سیکرٹری عالمگیر خان محسود، صوبائی رہنما راجہ اظہر خان ، انصاف اسٹیل لیبر یونین کے چیف آرگنائزر ہارون خٹک ، ڈپٹی چیف آرگنائزر رحمت کنڈی ، وحید سومرو، امبرین سیٹھی ، خرم بلوچ اور دیگر رہنماؤں نے بھی شرکت کی ۔

رکن قومی اسمبلی اسد عمر نے سیمینار سے خطاب کرتے ہوئے کہا کہ اسٹیل مل اور ان جیسے دیگر قومی اداروں کو نجکاری کے بجائے ایماندار ، محب وطن اور میرٹ کی بنیاد پر افسران کی تعیناتی کر کے ان اداروں کو اپنے پیروں پر کھڑا کیا جاسکتا ہے لیکن حکمران ٹولہ ان قومی اداروں کو فروخت کرنے پر بضد ہے اور حکومتی ٹولہ اپنے چہیتوں کو نوازنے کے لیے قومی اداروں کو اونے پونے داموں فروخت کرنے کے لیے پرتول رہی ہے ۔

(جاری ہے)

انہوں نے مزید کہا کہ تعجب کی بات ہے کہ ایک طرف حکمران شاہانہ زندگی گزار رہے ہیں تو دوسری طرف مزدوروں کے منہ سے آخری نوالہ بھی چھیننے کی کوشش کی جارہی ہے ، اسٹیل مل مزدوروں کی ابھی بھی 2سے زائد مہینوں کی تنخواہوں کے بقایات جات باقی ہیں ، وفاقی حکومت فی الفور مزدروں کی تنخواہیں ریلز انہیں مزید ذہنی اذیت سے نجات دی جائے ۔ اسد عمر نے مزید کہا کہ پاکستان اسٹیل مل کی نجکاری کی منظوری مشترکہ مفادات کونسل سے ہوگی جس کے ممبر وزیر اعلیٰ خیبر پختونخواہ پرویز خٹک بھی ہیں اور وہ پاکستان تحریک انصاف کی جانب سے پاکستان اسٹیل مل کی نجکاری کے خلاف بھر پور آواز بلند کرینگے ۔

اس موقع پر رکن صوبائی اسمبلی خرم شیر زمان نے خطاب کرتے ہوئے کہا کہ ہم پاکستان اسٹیل مل کو نجکاری کی بھینٹ نہیں چڑھنے دینگے انشاء اللہ ہم سندھ اسمبلی کے فلور پر اس مسئلے کے خلاف بھر پور آواز بلند کرینگے اور اپنی ہر ممکن کوشش کرینگے کہ اس مسئلے کو فوری طور پر حل کیا جائے ۔ مرکزی جوائنٹ سیکرٹری عالمگیر خان محسود نے انصاف اسٹیل لیبر یونین اور اسٹیل مل ملازمین کو یقین دلایا کہ ہمارے نو منتخب نمائندے اس سنگین مسئلے پر اسمبلی میں اپنا بھر پور کردار ادا کرینگے اور تحریک انصاف اس مشکل گھڑی میں آپ کے شانہ بشانہ کھڑی ہے ۔

اس موقع پر وائس آف پاک اسٹیل آفیسر ایسوسی ایشن کے رہنما مرزا مقصود نے خطاب کرتے ہوئے رکن قومی اسمبلی اسد عمر کو پاکستان اسٹیل مل کی قیام سے لیکر اب تک کی تمام صورتحال سے آگاہ کیا اور انہیں مکمل طور پر بریف کیا ۔