پاکستان میں حالیہ تبدیلیوں اور رپورٹس کا جائزہ لے رہے ہیں، امریکی محکمہ خارجہ

جمعرات 6 فروری 2014 13:15

واشنگٹن(اُردو پوائنٹ تازہ ترین اخبار۔ 6فروری 2014ء) طالبان کے ساتھ مذاکرات پا کستان کا داخلی معاملہ ہے لیکن ہونے والی حالیہ تبدیلیوں اور رپورٹس کا قریب سے جائزہ لے رہے ہیں۔امریکی محکمہ خارجہ کی ترجمان جین ساکی نے ڈیلی بریفنگ کے دوران کہا ہے کہ طالبان کے ساتھ مذاکرات کا عمل پاکستان کا اندرونی معاملہ ہے اور پاکستان اپنے اندرونی معاملات میں مکمل طور پر خود مختار ہے۔

(جاری ہے)

انہوں نے کہا کہ پاکستان دہشت گردی کے خلاف جنگ میں امریکا کا اتحادی ہے اور امریکا پاکستان کو پرامن ملک طور پر دیکھنا چاہتا ہے۔ اس موقع پر جین ساکی نے ڈرون حملوں کے آپریشنل معاملات پر تبصرے سے معذرت کی۔ محکمہ خارجہ کی ترجمان جین ساکی کی جانب سے جاری بیان میں کہا گیا ہے کہ اگر پاکستانی حکومت طالبان کے ساتھ مذاکرات کو امن کے لئے ضروری سمجھتی ہے تو وہ اس کیلئے خود مختار ہے، امریکہ نہ اس سلسلے میں کوئی رائے زنی کرے گا اور نہ ہی ان مذاکرات کی کامیابی یا ناکامی کے حوالے سے کوئی پیش گوئی کرے گا۔