وزیر اعظم نواز شریف کی آرمی چیف جنرل راحیل شریف سے ملاقات، سیکیورٹی سمیت مجموعی صورتحال پر تبادلہ خیال

منگل 28 جنوری 2014 15:41

اسلام آباد(اُردو پوائنٹ تازہ ترین اخبار۔ 28 جنوری 2014ء) وزیر اعظم نواز شریف اور چیف آف آرمی اسٹاف جنرل راحیل شریف کے درمیان ملاقات ہوئی ہے جس میں ملک کی مجموعی صورتحال پر تبادلہ خیال کیا گیاہے۔

(جاری ہے)

ذرائع کےمطابق وزیر اعظم نواز شریف اور آرمی چیف جنرل راحیل شریف کے درمیان ہونے والی ملاقات میں ملک کی سیکیورٹی اور سرحدی امور سمیت مجموعی صورتحال پر تبادلہ خیال کیا جب کہ پاک آرمی کے سربراہ جنرل راحیل شریف نے سیکیورٹی فورسز کی جانب سے شمالی وزیرستان میں دہشتگردوں کے خلاف کی جانے والی کارروائیوں سے متعلق بھی وزیر اعظم کو آگاہ کیا۔

واضح رہے کہ دہشت گردوں کی جانب سے سیکیورٹی فورسز اورعوامی مقامات پر پر پے در پے حملوں کے بعد پاک فوج کی جانب سے شمالی وزیرستان میں ان کے مشتبہ ٹھکانوں پر فضائی حملوں کئے گئے جس کے نتیجے میں متعدد ملکی اور غیر ملکی شدت پسند مارے گئے تھے۔