شاہ زین بگٹی نے خورشید شاہ سے مذاکرات کے بعد دھرنے کا مقام تبدیل کردیا

جمعہ 24 جنوری 2014 20:10

کشمور(اُردو پوائنٹ اخبار تازہ ترین۔24جنوری۔2014ء) شاہ زین بگٹی نے قومی اسمبلی میں قائد حزب اختلاف سید خورشید شاہ سے مذاکرات کے بعد دھرنا ختم کرنے کے بجائے اس کا مقام تبدیل کردیا ہے. نجی ٹی وی کے مطابق سندھ، بلوچستان اور پنجاب کے سنگم پر گزشتہ 5 روز سے بگٹی قبیلے کے سیکڑوں افراد شاہ زین بگٹی کی قیادت میں دھرنا دیئے بیٹھے ہیں جن سے مذاکرات کے لئے اپوزیشن لیڈر خورشید شاہ نے ملاقات کی اور مظاہرین سے ہمدردی کا اظہار کیا، اس موقع پرسید خورشید شاہ نے شاہ زین بگٹی سے دھرنا ختم کرنے کی اپیل کی، بعد شاہ زین بگٹی نے مذاکرات کے بعد دھرنا ختم کرنے سے معذرت کرتے ہوئے اس کا مقام تبدیل کرنے پرآمدگی ظاہر کی ۔

میڈیا سے بات کرتے ہوئے خورشید شاہ کا کہنا تھا کہ بگٹی قبیلے کی مشکلات کا احساس ہے، دھرنے کے مقام کی تبدیلی سے قومی شاہراہ ٹریفک کے لئے کھل جائے گی جبکہ شاہ زین بگٹی کا کہنا تھا کہ خورشید شاہ نے اپنی جماعت کی جانب سے تعاون کی یقین دہانی کرائی ہےاور امید ہے وہ اپنے وعدے کا پاس رکھیں گے۔

(جاری ہے)

واضح رہے کہ گزشتہ 9 سال سے کشمور میں آباد بگٹی قبیلے کے افراد شاہ زین بگٹی کی قیادت میں آبائی علاقے جانا چاہتے تھے جنہیں سیکیورٹی وجوہات پر جانے کی اجازت نہ دی گئی جس کے خلاف مظاہرین 5 روز سے دھرنا دیئے بیٹھے ہیں۔