پاکستان میں صحت عامہ کے شعبے میں 2002ء سے اب تک 32 کروڑ ڈالرز کی اعانت فراہم کی گئی ..
تازہ ترین : 1

پاکستان میں صحت عامہ کے شعبے میں 2002ء سے اب تک 32 کروڑ ڈالرز کی اعانت فراہم کی گئی ہے ، رچرڈ اولسن ، دونوں ممالک کے اشتراک کی بدولت زیادہ خواتین کو دوران زچگی علاج کی سہولتیں میسر ہیں ، امریکی سفیر

اسلام آباد(اُردو پوائنٹ اخبار تازہ ترین۔22 جنوری ۔2014ء) پاکستان میں تعینات امریکہ کے سفیر رچرڈ اولسن نے کہا ہے کہ امریکہ نے پاکستان میں صحت عامہ کے شعبے میں 2002ء سے اب تک 32 کروڑ ڈالرز کی اعانت فراہم کی ہے بدھ کو ایک تقریب سے خطاب میں کہا کہ ان کے ملک کی مدد سے پاکستان میں صحت عامہ کے شعبے میں بہتری آئی ہے اور خصوصاً زچہ و بچہ کو فراہم کی جانے طبی سہولتوں میں اضافہ ہوا ہے۔

انہوں نے کہاکہ امریکی ادارہ برائے بین الاقوامی ترقی ”یو ایس ایڈ“ نے جون 2013 میں ماں اور بچے کی صحت کے لیے ایک بنیادی پروگرام شروع کیا جس کا مقصد خواتین اور نوزائیدہ بچوں کو صحت عامہ کی سہولتوں میں بہتری، غیر مراعات یافتہ طبقے اور دو دراز آبادیوں کو صحت کی سہولتوں کی فراہمی ہے۔امریکی سفارتخانے سے جاری ایک بیان کے مطابق امریکہ نے پاکستان میں صحت عامہ کے شعبے میں 2002ء سے اب تک 32 کروڑ ڈالرز کی اعانت فراہم کی ہے جس کے تحت کراچی میں جناح پوسٹ گریجویٹ میڈیکل سنٹر میں امراض نسواں کا ایک وارڈ بھی قائم کیا گیا اس سہولت سے ایک لاکھ چالیس ہزار خواتین کو علاج کے علاوہ طب سے وابستہ 13 ہزار افراد کو تربیت فراہم کی جارہی ہے۔

امریکہ جیکب آباد میں ایک ہسپتال کی تعمیر کیلئے ایک کروڑ ڈالر کی مالی امداد بھی فراہم کر رہا ہے جس سے شمالی سندھ، جنوبی پنجاب اور مشرقی بلوچستان کے بارہ لاکھ رہائشیوں کو علاج معالجے کی سہولتیں میسر آسکیں گی۔امریکی سفیر اولسن نے کہا کہ دونوں ملکوں کے اشتراک کی بدولت اب زیادہ خواتین کو دوران زچگی علاج کی سہولتیں میسر ہیں اور زیادہ تر پیدائش تربیت یافتہ عملے کی زیر نگرانی مراکز صحت میں ہو رہی ہیں۔

یہ تقریب پاکستان کے قومی ادارہ برائے علم آبادیات کے زیر اہتمام سماجی اعدادو شمار اور صحت عامہ سے متعلق سال 2012 اور 2013 کی جائزہ رپورٹ کے اجرا کے لیے منعقد کی گئی تھی۔اس موقع پر وفاقی وزیر برائے منصوبہ بندی و ترقی احسن اقبال اور وزیرمملکت برائے قومی ہیلتھ سروسز سائرہ افضل تارڑ نے بھی شرکت کی۔

وقت اشاعت : 22/01/2014 - 21:55:28

متعلقہ عنوان :

اپنی رائے کا اظہار کریں