Live Updates

پنجاب حکومت کا کوئلے سے بجلی پیدا کرنے کابڑا منصوبے شروع کرنے کا اعلان، 10 ارب ڈالر تک کی سرمایہ کاری ہوگی‘ شہباز شریف،3 سے 5 برس کے دوران کوئلے سے 6ہزارمیگاواٹ بجلی پیدا کی جائیگی، پنجا ب حکومت 660میگاواٹ کے2 پلانٹس خود لگائیگی،کول پاور پلانٹس کیلئے 6مقامات کا انتخاب کر لیا ہے، منصوبہ صارفین ، صنعت اور زراعت کیلئے مطلوبہ بجلی کی فراہمی کیلئے مددگار ہوگا، سستی بجلی کا حصول ممکن ہوگا،روزگار کے وسیع تر مواقع پیدا ہوں گے ،یہ منصوبہ حقیقی ترقی اور قومی خوشحالی کا ایک عظیم منصوبہ ہے ‘ وزیر اعلیٰ کی پریس کانفرنس

بدھ 22 جنوری 2014 21:25

پنجاب حکومت کا کوئلے سے بجلی پیدا کرنے کابڑا منصوبے شروع کرنے کا اعلان، ..

لاہور(اُردو پوائنٹ اخبار تازہ ترین۔22 جنوری ۔2014ء) وزیراعلیٰ محمد شہباز شریف نے صوبہ پنجاب میں کوئلے کے ذریعے بجلی پیدا کرنے کے ایک بڑے منصوبے پر عملدرآمد کا اعلان کرتے ہوئے کہا ہے کہ قومی اہمیت کے اس منصوبے کا مقصدتین سے پانچ برس کے دوران پنجاب میں کوئلے کے ذریعے 6000میگاواٹ بجلی پیدا کرنا ہے اور کوئلے سے بجلی پیدا کرنے کے ان منصوبوں میں8سے 10 ارب ڈالر کی براہ راست سرمایہ کاری ہو گی، وزیراعلیٰ نے اس منصوبے کی جلد ازجلد تکمیل اور بہتر نتائج حاصل کرنے کے لئے حکومت پنجاب کی جانب سے اس پراجیکٹ کے تحت 660میگاواٹ کے 2پلانٹس خود لگانے کا بھی اعلان کیا ہے،حکومت پنجاب نے فی الوقت کوئلے سے بجلی بنانے کے پلانٹ نصب کرنے کے لئے پنجاب میں 6مقامات کا انتخاب کیا ہے جو قادر آبادضلع ساہیوال‘ بھکھی ضلع شیخوپورہ‘ حویلی بہادرشاہ ضلع جھنگ‘ بلوکی ضلع قصور‘ترنڈہ ساوے والارحیم یار خان اور موضع کرم داد قریشی ضلع مظفر گڑھ میں واقع ہیں، حکومت اس مقصد کے لئے نجی شعبہ کی حوصلہ افزائی اور بجلی کی پیداوار میں اس کی شمولیت کو یقینی بنانے کی خاطر ٹھوس اور نتیجہ خیز اقدامات کرے گی۔

(جاری ہے)

وہ ماڈل ٹاؤن میں پرہجوم پریس کانفرنس سے خطاب کر رہے تھے۔ اس موقع پر صوبائی وزراء رانا ثناء اللہ خان، چوہدری محمد شفیق، ملک ندیم کامران، شیر علی خان، چیف سیکرٹری، سینئر ممبر بورڈ آف ریونیو، ایڈیشنل چیف سیکرٹری توانائی، متعلقہ سیکرٹریز اور اعلیٰ حکام بھی موجود تھے۔وزیراعلیٰ محمد شہباز شریف نے پریس کانفرنس سے خطاب کرتے ہوئے کہا کہ پاکستان کو اس وقت دو بڑے مسائل درپیش ہیں جن میں ایک توانائی کا بحران ہے اوردوسرا انتہا پسندی کاخاتمہ،بجلی اورگیس کی فراہمی مضبوط معیشت کے لیے انتہائی اہمیت کی حامل ہے۔

معیشت پھلے پھولے گی تو انتہا پسندی کے رحجانات میں کمی آئے گی۔زراعت اورصنعت ترقی کرے گی تو روزگار کے نئے مواقع پیدا ہوں گے۔پنجاب حکومت نے صوبے میں کوئلے سے بجلی کے پلانٹس لگانے کی منصوبہ بندی کی ہے اور ہم نے انتہائی محنت سے کول پاور پلانٹس لگانے کے حوالے سے اپنے اقدامات کو حتمی شکل دی ہے ۔ان پاور پلانٹس کے لیے کراچی سے بذریعہ ریل کوئلے کو پنجاب ٹرانسپورٹ کیا جائے گا۔

انہوں نے بتایا کہ گذشتہ ماہ انہوں نے بھارت کے مشرقی پنجاب میں مختلف مقامات پر کول پاور پلانٹس کا دورہ کیا وہاں پر چینی کمپنیاں ہزاروں میگا واٹ کے پلانٹس پر کام کررہی ہیں ۔چین میں 65فیصد،بھارت میں 63فیصد ،جرمنی میں 60فیصداور امریکہ میں 50فیصد سے زائد بجلی کوئلے سے حاصل کی جارہی ہے جبکہ پاکستان میں ایک فیصد سے بھی کم بجلی کوئلے سے پیدا ہوتی ہے جبکہ تھرمل سے پاکستان میں 65فیصد بجلی حاصل کی جارہی ہے اورہائیڈل سے 35فیصد ،بدقسمتی سے گذشتہ کئی دہائیوں کی غلط منصوبہ بندی اور حکمت عملی کے باعث پاکستان میں کم پیداواری لاگت سے بجلی کا حصول ممکن نہیں بنایا جاسکا۔

پانی سے بجلی حاصل کرنے کے حوالے سے بھی خاطر خواہ کام نہیں ہواصرف کاغذی کارروائیاں کی گئی ہیں۔پنجاب حکومت نے قائد اعظم سولر پارک میں ایک سو میگا واٹ کے سولر منصوبے پر کام شروع کررکھا ہے اورفروری کے وسط تک اس منصوبے کی بڈز موصول ہوجائیں گی تاہم 24گھنٹے بجلی پیدا کرنے کے لیے کوئلہ سب سے بہترآپشن ہے ۔بدقسمتی سے پاکستان اس وقت بجلی پیدا کرنے کے لیے تیل کی درآمد پر 10ارب ڈالر خرچ کررہا ہے جس کی پاکستانی معیشت متحمل نہیں ہوسکتی۔

درآمدی تیل سے بجلی کی قیمت 19روپے فی یونٹ جبکہ درآمدی کوئلے سے بجلی کی قیمت صرف 9روپے فی یونٹ مقرر کی گئی ہے ۔انہوں نے کہا کہ پاکستان میں تھر میں کوئلے کے وسیع ذخائر موجود ہیں جبکہ پنجاب میں 500ملین ٹن کوئلہ موجود ہے ۔جس کے بارے میں آسٹریلوی کمپنی نے فیزبیلیٹی رپورٹ تیار کی ہے تاہم پنجاب کا کوئلہ زیادہ معیاری نہیں ہے ۔فی الوقت شارٹ ٹرم کے طورپر امپورٹڈ کول کے ذریعے یہ پلانٹ چلائے جائیں گے ۔

بعدازاں ان پلانٹس کو لوکل کوئلے پرچلایا جائے گا۔ انہوں نے کہا کہ پنجاب حکومت نے کوئلے سے بجلی پیدا کرنے کیلئے جن مقامات کا انتخاب کیا ہے وہ اس لحاظ سے انتہائی اہم ہیں کہ یہاں بجلی کے استعمال کے بڑے مراکز کے قریب ہیں اور یہاں سے تیار ہونے والی بجلی کو فوری طور پرنیشنل گرڈ میں ڈالا جا سکے گا۔ یہ مقامات ریلوے ٹریک اور سڑک کے قریب ہیں اورسب سے بڑھ کر ان مقامات کے قریب پانی دستیاب ہے۔

انہوں نے کہا کہ کوئلے کے ذریعے بجلی کی پیداوار پر مبنی اس منصوبے کا مقصد پرائیویٹ شعبے کی حوصلہ افزائی اور رہنمائی کر کے اس شعبے کو حکومت کی ان کوششوں میں شامل کرنا ہے جووہ توانائی کے بحران کو ختم کرنے کے لئے کر رہی ہے۔ چنانچہ حکومت نے مذکورہ مقامات پر کوئلے سے بجلی کی پیداوار کے پلانٹس لگانے کے لئے جو قطعات اراضی منتخب کی ہیں انہیں ایک کھلے‘ مسابقتی اور شفاف عمل کے ذریعے نجی شعبے کے سپرد کیا جائے گا۔

اس مقصد کے لئے قومی اور بین الاقوامی ذرائع ابلاغ میں اشتہارات دیئے جائیں گے۔ حکومت کی طرف سے ان سائٹس کے انتخاب کا ابتدائی کام کرنے کا مقصد یہ ہے کہ بجلی کے موجودہ بحران کو کم سے کم وقت میں دور کرنے کے لئے یہاں جتنی جلد ہو سکے پاور پلانٹ لگ سکیں۔ اگر اس سلسلے میں پرائیویٹ سیکٹر دیگر موزوں جگہوں کی نشاندہی کرے تو حکومت اس پر بھی غور کرے گی۔

انہوں نے کہا کہ ریلوے حکام نے پنجاب حکومت کو یقین دلایا ہے کہ وہ مجوزہ منصوبے کی ضروریات کے مطابق کوئلے کی فراہمی کو یقینی بنانے کے لئے مقررہ مدت کے اندر اپنے نظام میں ضروری تبدیلیاں اور بہتری لائیں گے۔انہوں نے کہا کہ ریلوے کے ذریعے کوئلے کی نقل وحمل سے ریلوے کو سہارا ملے گااوران کی استعدادکار میں بھی بہتری آئے گی۔ انہوں نے کہا کہ نئی ٹیکنالوجی کے تحت بننے والے ایسے جدید کول پاور پلانٹس میں فضائی آلودگی پر مبنی مسائل پر بڑی حد تک قابو پا لیا گیا ہے اور ہم انشاء اللہ پنجاب میں ایسے ہی جدید ترین پلانٹس جنہیں Super Critical پلانٹس کہا جاتا ہے نصب کریں گے۔

اس وقت چائنہ‘ امریکہ اور جرمنی کے علاوہ ہندوستان میں بھی ایسے ہی پلانٹس لگائے جا رہے ہیں۔ یہ پلانٹس جہاں ماحول دوست ہیں وہاں ان کی ایندھن کی کارکردگی بھی کہیں بہتر ہے۔ حکومت پنجاب اس امر کوبھی یقینی بنائے گی کہ اس منصوبے میں ماحولیات سے متعلق پاکستان کے تمام وفاقی اور صوبائی سطح کے قوانین میں درج اصولوں کے علاوہ ماحولیات کے حوالے سے بین الاقوامی تقاضوں کی بھی سختی سے پابندی کی جائے۔

انہو ں نے کہا کہ پنجاب میں کوئلے کے ذریعے بجلی پیدا کرنے کا یہ منصوبہ بجلی کے بحران کے خاتمے میں ایک اہم سنگ میل ثابت ہو گا۔ قومی اہمیت کا یہ منصوبہ جہاں عام صارفین اور ملکی صنعت اور زراعت کے لئے مطلوبہ بجلی کی فراہمی کے لئے مددگار ہوگا‘ وہاں اس کے ذریعے سستی بجلی بھی حاصل ہو سکے گی‘ جس سے بجلی کے ٹیرف میں کمی لانا ممکن ہو سکے گا۔

صرف یہی نہیں بلکہ یہ منصوبہ لاکھوں ٹن کوئلے کی نقل و حمل کی بدولت ریلوے کی بحالی میں بھی مددگار ثابت ہو گا۔ میرے نزدیک یہ منصوبہ حقیقی ترقی اور قومی خوشحالی کا ایک عظیم منصوبہ ہے جس کے نتیجے میں روزگار کے وسیع تر مواقع بھی پیدا ہوں گے اور جس کے مثبت اثرات قومی معیشت کے ہر شعبے میں نمایاں طور پر دیکھے جا سکیں گے۔ انہوں نے کہا کہ اس منصوبے کے حوا لے سے ملکی و غیر ملکی اخبارات میں اشتہار دےئے جارہے ہیں جبکہ روڈ شو بھی منعقد کیے جائیں گے۔

انہوں نے کہا کہ سابق حکمرانوں نے بجلی کی پیدوار میں اضافے کے حوالے سے صرف وقت ضائع کیا ہے ہم توانائی کے منصوبوں پر دن رات کام کرکے ضائع ہونے والے وقت کی تلافی کریں گے اور وطن عزیز کو توانائی کے بحران سے نجات دلائیں گے۔انہوں نے کہا کہ کوئلے کی بنیاد پر توانائی کے منصوبوں کی تکمیل سے نہ صرف بجلی کی کمی کا مسئلہ حل ہوگا بلکہ پاکستان اور پنجاب میں خوشحالی کا انقلاب آئے گا۔

بعدازاں میڈیا کے سوالات کاجواب دیتے ہوئے وزیراعلی نے کہا کہ ہم حالت جنگ میں ہیں ،افسوس کی بات ہے کہ مختلف شہروں میں حملے اوردھماکے ہورہے ہیں اب پوری قوم کو فیصلہ کرنا ہوگا کہ انتہا پسندی کے ناسور سے ہر حال میں نمٹنا ہے اور پوری قوم کواس مقصد کے لیے ایک پلیٹ فارم پر متحد ہونا ہوگا۔ انہوں نے کہا کہ افسو س کی بات ہے کہ پولیو ورکرز کو بھی نشانہ بنایا جارہا ہے۔ وزیراعظم محمد نواز شریف ملک کو انتہا پسندی کے ناسور سے نجات دلانے کے لیے پر عزم ہیں اورقومی اتحاد کے لیے سنجیدہ کاوشیں کررہے ہیں۔

Live وزیراعظم شہباز شریف سے متعلق تازہ ترین معلومات