سری لنکا نے پاکستان کو دوسرے ٹیسٹ میچ میں 9 وکٹوں سے ہرا کر سیریز میں ایک صفر کی برتری حاصل کرلی ، سیریز کا تیسرا اور آخری میچ 16 جنوری سے شارجہ میں کھیلا جائے گا

اتوار 12 جنوری 2014 20:39

دبئی(اُردو پوائنٹ اخبار تازہ ترین۔12 جنوری ۔2014ء) سری لنکا نے پاکستان کو دوسرے ٹیسٹ میچ میں 9 وکٹوں سے ہرا کر سیریز میں ایک صفر کی برتری حاصل کرلی ہے۔دبئی میں کھیلے گئے دوسرے ٹیسٹ کے آخری روز پاکستان نے اپنی دوسری نامکمل اننگز کا آغاز کیا تو اس کا اسکور 7 کھلاڑیوں کے نقصان پر 330 رنز تھا، سرفراز احمد نے 70 جبکہ سعید اجمل نے 7 رنز کے ساتھ اپنی اننگز دوبارہ شروع کی، کچھ ہی دیر میں پاکستان کی آخری امید سرفراز احمد 74 رنز بنا کر آوٴٹ ہوگئے جس کے بعد سعید اجمل نے راحت علی کے مل کر 20 قیمتی رنز جوڑے اور اسکور کو 354 رنز پر پہنچایا، اس موقع پر راحت علی کو لکمل نے ٹھکانے لگایا وہ صرف 8 رنز ہی بناسکے، پاکستان کی آخری وکٹ 359 رنز پر گری اور آوٴٹ ہونے والے کھلاڑی سعید اجمل تھے جنہوں نے 21 رنز بنائے، اس طرح پاکستان نے سری لنکا کو ٹیسٹ میں فتح اور سیریز میں ناقابل شکست برتری حاصل کرنے کے لئے 137 رنز کا ہدف دیا ہے۔

(جاری ہے)

پاکستان کی جانب سے دوسری اننگز میں کپتان مصباح الحق نے 97، یونس خان نے 77 جبکہ سرفراز احمد نے 74 رنز کی نمایاں اننگز کھیلی، سری لنکا کی جانب سے لکمل نے 4 جبکہ پرادیپ، ہیراتھ اور ایرنگا نے 2،2 وکٹیں حاصل کیں۔جواب میں سری لنکا نے مطلوبہ ہدف ایک وکٹ کے نقصان پر ہی حاصل کرلیا، سری لنکا کی جانب سے اوپنرز سلوا اور کرونارتنے نے نصف سنچریاں اسکور کیں اور بالترتیب 58 اور 62 رنز بنائے، پاکستان کی جانب سے واحد کامیابی سعید اجمل نے سلوا کو آوٴٹ کرکے حاصل کی۔سری لنکا کو پاکستان کے خلاف ٹیسٹ سیریز میں ایک صفر کی ناقابل شکست برتری حاصل ہوگئی ہے جبکہ سیریز کا تیسرا اور آخری میچ 16 جنوری سے شارجہ میں کھیلا جائے گا۔