چیئرمین ضلع کونسل ملتان کیلئے مسلم لیگ(ن)کے نامزد امیدوار دیوان عباس کے کا غذات ..
تازہ ترین : 1

چیئرمین ضلع کونسل ملتان کیلئے مسلم لیگ(ن)کے نامزد امیدوار دیوان عباس کے کا غذات نامزدگی مسترد

قانون کے مطابق یوسی چیئرمین ہی چیئرمین ضلع کونسل کا الیکشن لڑسکتا ہے‘الیکشن ٹربیونل ضلع کونسل کیلئے مسلم لیگ(ن) کا متبادل امیدوار نہ ہونے کے سبب اب مقابلہ تحریک انصاف اور پیپلزپارٹی کے درمیان ہوگا ْفیصلے پر پی ٹی آئی کارکنوں کا جشن،مٹھائیاںتقسیم،حق اور سچ کی فتح ہے‘پی ٹی آئی امیدوار

ملتان(اُردو پوائنٹ اخبارتازہ ترین۔ 15 دسمبر2016ء)الیکشن ٹربیونل نے چئیرمین ضلع کونسل ملتان کیلئے مسلم لیگ(ن)کے نامزد امیدوار دیوان عباس کے کا غذات نامزدگی مستردکردئیے۔ذرائع کے مطابق دیوان عباس کے کاغذات یوسی چئیرمین کی نشست سے استعفیٰ دینے پر مسترد کیے گئے۔ضلع کونسل کیلئے مسلم لیگ(ن)کا کوئی متبادل امیدوار نہ ہونے کے سبب چئیرمین ضلع کونسل ملتان کی نشست کیلئے تحریک انصاف اور پیپلزپارٹی کے امیدواروں کے درمیان مقابلہ ہوگا۔

تفصیلات کے مطابق الیکشن ٹربیونل کی اپیلن کورٹ میں سیشن جج بہادرعلی خان نے چئیرمین ضلع کونسل ملتان کیلئے مسلم لیگ(ن)کے نامزد امیدوار دیوان عباس کے کا غذات نامزدگی مستردکردئیے۔دیوان عباس کیخلاف حریف پی ٹی آئی کے امیدوار چئیرمین ضلع کونسل عمر فاروق نے درخواست میں اعتراض عائد کیا تھاکہ (ن) لیگ کے نامزد امیدوار دیوان محمد عباس بخاری نے قبل ازیں یوسی 180علی پور سے یوسی چیئرمین کا الیکشن لڑا اور کامیاب ہوا لیکن بعد ازاں جب این اے 153پر ضمنی الیکشن ہوئے تو انہوں نے یوسی چیئرمین شپ سے استعفیٰ دے کر ایم این اے کی سیٹ پر کاغذات نامزدگی جمع کرا دیئے جس میں باقائدہ طور پر انہیں انتخابی نشان بھی الاٹ ہوا لیکن اب جبکہ ضلع کونسل کے الیکشن ہو رہے ہیں تو انہوں نے اپنے کا غذات نامزدگی چیئرمین ضلع کونسل کے لئے جمع کرا دیئے ہیں جو کہ سراسر خلاف قانون ، خلاف واقعات اور بد نیتی پر مبنی ہے۔

اس لئے ان کے کا غذات نامزدگی کو منسوخ کیا جائے۔جس پر الیکشن ٹربیونل نے دیوان عباس بخاری کے کا غذات نامزدگی مسترد کردئیے۔الیکشن کمیشن ذرائع کا کہنا ہے کہ قانون کے مطابق صرف یوسی چئیرمین ہی چئیرمین ضلع کونسل کا الیکشن لڑسکتا ہے۔دوسری طرف ضلع کونسل ملتان میں دلچسپ صورتحال پیدا ہوگئی ہے۔دیوان عباس بخاری کے کاغذات نامزدگی مسترد ہونے کے بعدضلع کونسل کیلئے مسلم لیگ(ن)کا کوئی کورنگ امیدوار بھی نہیں ہے جس کے بعد چئیرمین ضلع کونسل کی نشست کیلئے تحریک انصاف اور پیپلزپارٹی کے امیدواروں کے درمیان مقابلہ ہوگا۔

دریں اثناء الیکشن ٹربیونل کا فیصلہ سامنے آنے پرتحریک انصاف کے کارکنوں نے جشن منایا۔ تحریک انصاف کے امیدوار چئیرمین ضلع کونسل عمرفاروق کھوکھر،وائس چئیرمین ملک جمشید لابر،چوہدری جاوید اقبال،ڈاکٹر فیاض،ذوالفقار کھاکھی،ابراہیم خان ودیگر نے مٹھائی تقسیم کی۔ اس موقع پرپی ٹی آئی رہنمائوں وکارکنوں کا کہنا تھا کہ فیصلہ حق اور سچ کی فتح ہے۔

مزید متعلقہ خبریں پڑھئیے‎ :

وقت اشاعت : 15/12/2016 - 21:24:01

اپنی رائے کا اظہار کریں