لاہور سمیت پنجاب کے مختلف شہروں میں موسلادھار بارش، 2 افراد جاں بحق، متعدد زخمی

جمعہ 18 اپریل 2014 18:03

لاہور(اُردو پوائنٹ تازہ ترین اخبار۔ 18اپریل 2014ء) پنجاب کے مختلف شہروں میں آندھی اور موسلادھار بارش کے نتیجے میں 2 افراد جاں بحق اور متعدد زخمی ہوگئے۔ لاہور، مری، ڈیرہ غازی خان، گوجرانوالہ اور خانیوال سمیت دیگر نواحی شہروں میں موسلادھار بارش کے نتیجے میں نشیبی علاقے زیر آب آگئے۔ گوجرانوالہ میں مکان کی چھت گرنے سے 2 افراد جاں بحق جب کہ لاہور سمیت دیگر شہروں میں آندھی کے باعث سائن بورڈ گرنے سے متعدد افراد زخمی ہوگئے۔

(جاری ہے)

شدید بارش کی وجہ سے کئی علاقے بجلی سے محروم ہوگئے جب کہ صرف لاہور میں 100 سے زائد فیڈر ٹرپ کرگئے۔ لاہور اور مری میں شدید بارش کے باعث ندی نالوں میں طغیانی آگئی اور سڑکوں پر پانی جمع ہوگیا جس کے باعث دفاتر سے گھر جانے والوں کو شدید مشکلات کا سامنا کرنا پڑ رہا ہے۔

دوسری جانب ملتان، فیصل آباد، گوجرانوالہ، میاں چنوں، سمندری اور گرد و نواح میں بھی بوندا باندی کا سلسلہ جاری ہے جس کے باعث موسم خوشگوار اور گرمی کا زور ٹوٹ گیا۔ محکمہ موسمیات کے مطابق پنجاب کے مختلف علاقوں میں بارشوں کا سلسلہ آئندہ 24 گھنٹوں تک جاری رہنے کا امکان ہے۔